Txingurrien eraginez pipar landareak izurratzen hari zaizkidak pulgoiaren ondorioz!!! osto azpi ta punta berrietan zeudek!! Zein izango hukek soluzio eraginkorra? Ozpinak on egingo al lieke? Eskerrikasko.

Onena duk xaboi potasikoarekin tratatzea. Egunero tratatu garbitu arte. Tratamendua gogortzeko Neem nahastu eta aukera izanez gero Bacillus thuringiensis. Seguruenera ez duk beharko, xaboia nahikoa izango dukela iruditzen zaidak.

Kaixo Jakoba. Bi astetik behin larrosa, hortentsi eta larrosei ongarria ematen diegu (nitrogenoa, burnia, kobrea). Noiz arte da beharrezkoa ongarria ematea? 4 saiotan eman diegu. Eskerrik adko zure lanagatik

Udazkeneko oinarrizko ongarriketa emanez gero ondoren ez dago gehiago eman beharrik. Ongarriketa organiko naturala da gakoa, simaurra, luarra, zizare-lurra, edo nahi duzuna. Horrekin nahikoa dute, baldin eta arazo bereziren bat ez badago. Orain ere onena hori ematea litzateke. Baina udazkenean gogoan izan ongarria ondo ematea.

Kaixo Jakoba! Galdetu nahi dizut bainatako pulgoiari buruz.bainak oaintxe hasi dirá ematen,baño pulgoia sartzen hari zaio dezente.Hori nola ahalko nuke menderatu edo geldiarazi jakin nahiko nuke.Nik momentuz gaur potto horiak jarri dizkiot olioarekin igurtziak. Zure erantzunaren zai geratzen naiz,ze esan didate botika sistémico bat botatzeko,baño Gero ezin omen dela7egunetan han edo bildu,eztakit. Millaesker Jakoba!

Ohikoa du lekak zorriaren erasoa. Gehiago ongarri asko baldin badu lurrak. Dagoeneko erasoa egonik hasi ahal duzun azkarren xaboi potasikoarekin tratatzen. Onena eta eraginkorrena xaboi potasikoa eta Neem. Baita nahi baduzu erantsi Bacillus thuringiensis, baina ez da beharrezkoa. Hasi 3-4 egunetik behin tratatzen. Busti landare osoa alde guztietatik, gauza ez baita landarea bustitzea soilik, zorriak busti behar dira. Garbitutakoan zaindu eta bateren bat berriz ikusiz gero behin edo bitan tratatuta nahikoa. Tratamendu horrekin bustita ere jan ditzakezu lekak, ez dago arazorik. Intsektizida sistemikoekin bai, pozoia barrura sartzen da eta lekak ere pozoitzen dira, pozoia guregana ekarriz. Inolaz ere ez erabili horiek sekula.

Lekak lehortzen ari dira.Hostoak horixkatzen eta ximeltzen.Zer egin dezaket?Mila esker zure laguntzagatik.

Bi arrazoi izan daitezke. Bata nitrogenodun ongarri gehiegia edo gaindosia. Bestea hezetasun handiegia, lurrean edo inguruko airean. Gehienetan bigarren hau izaten da arazoa. Ureztatzen delako, azpian plastikoa jarri delako edo euria maiz egiten duelako lur azalari lehortzeko tarterik eman gabe. Horrek gaitzak dakartzaten onddoak suspertzen ditu eta horitzea hortik letorke, gaitzetik.

Egun on: Udaberrian konturatu gara ortu barrenean zeuden spirae zuria eta malus apaingarria hil egin direla, ez dakigu nola; eta orain, ortu erdiraino jarri ditugun landara ia guztiak usteldu dira, eta berriak jarrita ere, egun gutxitara usteltzen dira (babarrun, tomate, piper). Zer gertatzen ari ote den ba al dakizu? Erremdiorik ba ote dago? Eskerrik asko.

Argazkietan ikusten denez sagarrondoa desbrozadorarekin edo bestelako zerbaitekin ipurdian jo egin da, eta zauri larriak ditu. Zauri horietatik lurreko gaitzak sartzen dira, onddoak eta egurra usteltzen dute. Agian espireari ere antzeko zerbait gertatu zaio. Piperrek ere antzeko itxura dute, lepo aldean azala galdua, hor agian lepoko gaitza sartu da. Nik esango nuke gune horretan hezetasuna oso handia dela eta sufritzen dauden landareek ezin dutela aurrera egin hezetasunak ekarritako onddoen gaitzen eraginez. Irtenbidea hezetasuna kentzea litzateke: itzala kendu, belarrari motz eutsi, lurrazala harrotu, karea eman, drainajea antolatu. Eta desbrozadorarekin kontuz.

Aupa Jakoba Piperrak landatu genituenetik ez dira hasi eta moteldu eta hil dira. Zer egingo dut, eutsi edo berriak landatu?

Hil baldin badira berriak jarri beste aukerarik ez duzu. Zergatik hil dira, hori jakin beharko genuke hanka berriz ez sartzeko. Piperra eguzkizale amorratua da. Itzalik ba al du? Beroa gustatzen zaio eta lehorra ere bai. Ez zarete ba ureztatu eta ureztatu ariko? Kontuz horiekin.

Pasa den urtean eta aurten gauza bera gertatu zait. Kuia ondo hasten da, indarrez, baina kuia txikiren bat agertu orduko zimeldu egoten da, ur falta balu bezala, baina ura eman eta eman nabil (pasa gabe) eta ez doa aurrera. Beroarekiko oso sentibera izan daiteke?

Hokkaido kuiari jeneralean frantsesezko izena, Potimarron esaten zaio (Cucurbita maxima var. Hokkaido). Nik esango nuke polinizazio arazoa dagoela. Aurten asko ikusten ari garen arazoa. Hori konpontzeko hartu lore arrak, atzean txorten mehe zuzena dutenak eta petaloak kendu eta erdian duen polenez betetako txortenarekin igurtzi lore emeak, atzean kuiatxo txiki bat dakartenak, barruan. Lan hori bi edo hiru egunero errepikatu, lore emeak ez galtzeko.

Kaixo: Azken urteetan lurrean zomorroren bat landareak izorratzen dabilkigula uste dugu. Errukula, uraza, zerba, azalore, brokoliak zulatuta, eta oraingoan piper landare nahiko koxkortuak, baita baina landareren bat ere ihartuta azaldu zaizkigu. Diatomea lurrarekin eutsi ahal izan diogu noizbait, baino, ez erabat. Ez dakigu zer dugun etsai eta horixe jakin nahiko genuke, ea zuek badakizuen? Aldez aurretik, eskerrik asko. Segi ondo.

Nik uste dut argazkiko sarraskia egiteko lurreko zomorro bat baino zerbait handiagoa izango dela. Pentsatzen dut gauez ere bisitaren bat egingo zenutela eta bareak eta barraskiloak baztertu. Hostoetako horzkada horiek nabarmenak dira, eta horiek ezean untxi, orkatz edota horrelakoren batean pentsatu. Zuek jakingo duzue hor zer fauna klase dabilen, horrela jan eta baita ipurditik ateratzeko… beste gauza bat da lurpetik mozten badituzte. Horiek har beltzak izan daitezke. Moztutako landarearen ipurdiko lurra miatu behar da, makal mugitzen da eta normalean hortxe harrapatzen da…

Kaixo Iagoba, lankide bati fruitu arbola bat loreontzi eder batean oparitu nahi diogu. Baserri/txaletean bizi da bera eta atarte inguruan jartzeko litzateke. Zer gomendatzen duzu?

Loreontzian fruitu arbola jartzea etorkizunik gabeko lana da. Loreontzi erraldoia beharko luke, lurrean jartzearen tankerakoa. Bestela, loreontzian bizitzeak eta gehiago lorea eta fruitua ematea nahi baduzu, izugarrizko lanak hartu behar dituzu. Lurra sekula ez lehortzeko adinako ureztaketa, ongarriketa maiz egin beharra, inausketa zehatz-mehatza zirujauaren tankerakoa… Nire ustez ez du merezi.

Kaixo, hazitik ateratako limoiondo bat daukat, orain dela 8 urte +/-. Lorontzi haundi baten dago eta hasi egiten da, baina ez du fruiturik ematen. Emango ote du ??? Zer falta zaio???? Milesker! Loli

Hazitik sortutako fruitu arbolek askoz denbora gehiago behar dute loretu eta fruitua emateko. Txertatutakoei lehenago sortzen zaie ugaltzeko grina. Hala ere zure ustez loreontzi handia da hori, baina begiratu adaburuak edo hostajeak duen tamaina eta loreontziarena. Loreontzi hori OSO TXIKIA da. Jarri hiru edo lau aldiz handiagoa, toki horretan kabitzen den handiena eta ongarriketa ez ahaztu. Azaroan lurrazala simaur onduz estali eta gero urtean zehar ureztaketa urari ongarri likidoa nahasi, udazkenean eta neguan ezik hilean bitaz gutxienez.

Egun on Jakoba, Pablo eta Maite gara Lazkaotik.

Baratzako tomate eta kalabazinekin arazotan gabiltza eta zer izan daitekeen kontsultatu nahiko genuke zurekin, lehen bait lehen konponbidea bilatzeko.

Tomate landarari lora erortzen ari zaio eta kalabazina hazten hasi eta berehala usteldu egiten da. Ez dakigu lurrari ongarriren bat falta ote zaion edo beste arazoren bat izan litekeen. Baratza negutegirik gabeko baratza da. 

Ea lagun diezagukezun, mila esker.
Pablo eta Maite.

Loreak erortzearen arrazoia polinizazio faltarena izan daiteke. Nik uste dut argazkietan ikusten dena pasa den asteetan izan ditugun bero latz horien ondorioa dela. Horrez gain, polinizazioa gertatzeko haizeak edo polinizatzaileak behar dira. Horren faltan jendeak gero eta gehiago loreak kitzikatzen ditu: loreak mugituz edo dantzatuz polena mugitzeko. Barietateen arabera errazagoa edo zailagoa da, lorearen forma da arrazoia. Tenperatura altuegiek eta hezetasun urriak polena lehortu eta alferrik galtzen dute. Hezetasun handiak polena bildu, itsatsi egiten du eta ezin ondo ernaldu lorea. Ernaldu berritan eroritako loreek ongarri berezien falta izan dezakete (fosforoa, kaltzioa, magnesioa, boroa, molibdenoa…) jeneralean arazo hori beste ongarrien gaindosiak dakar, batez ere nitrogenoarena. Simaur tipoko edo okerrago zakuko ongarri kimiko gehiegi eman delako, alegia. 

Kuiatxoarena berdin polinizazio falta da. Lore emeak kuiatxo txikia dakar irekitzen denerako eta ernaldu edo ez kuiatxoa hor dago. Ernaltzen bada, hau da lore arrak eman duen polena lore emera iritsi eta ernaltzen badu, atzean daraman kuiatxo hori haziko da. Polinizazio egokirik gabe luiatxo hori geratzen da baina usteldu beste aukerarik ez du izango. Honetan eskuz polinizatzea gomendatzen da. Lore arra (atzean kuiatxoa ez duena, txorten mehe luzea duena) hartu, petalo horiak kendu eta erdian duen muturtxoarekin lore emeen barrukoa igurtzi. Hori maiz egin, lore emeak ireki ahala, ernaltze egokia ziurtatzeko. 

Etxe inguruko landan urten dabe belar batzuk oso bizkor zanaltzen ari direnak beste belarren kaltetan Zer egin genezake euren kontra? Beste landaren bategaz aurre egin? Produktu edo zeozegaz desagerrarazi? Bizkaian bizi gara, Ziortza-Bolibarren Argazkia erantsita

Belar hori oso ugaria da hemen. Batez ere mugitutako lurretan sortzen da: bide bazter, betelan eta abarretan. Kentzeko era errazena moztea da. Ipurdi-ipurditik moztu eta berritzen bada berriro moztu. Lan hori eraginkorragoa da ilgoran eginez gero. Uztaileko ilgora 9tik 22 eguerdia arte izango da, eta onena 15etik 20 artean, biak barne. Abuztuan ere ez da txarra; ilgora 6tik 18ra, eta egun onenak 12, 13 eta 14.

Kaixo Jakoba: Etxe zahar bat txukundu nahian gabiltza eta laguntza eskatu nahi genizuke, argazkian ikusiko duzun pareta horren kontra (edo paretatik gertu behintzat), ze lore-landare jarri erabakitzeko. Orain, osinak ateratzen dira. Paretak mendebaldera ematen du eta teilatupea da, Leitzan. Ureztaketa gutxi behar luken ze lore-landare gomendatuko zeniguke?

Osinak egoteak esan nahi du lur oso aberatsa dela. Ongarri faltarik ez du izango urte batzuetan behintzat. Loreen aukeraketari buruz, garrantzitsua da zuen gustuaren arabera aukeratzea. Nik horrelako tokietan nahiago izaten dut landare bakarra jarri, horrela ikusgarriagoa da. Nirea balitz kalak jarriko nituzke. Lehendik kalak dauden tokiren bat aurkitu eta lurpetik erraboilak atera eta landatu. Metro erdi bateko tartearekin jarri eta denbora gutxian multzo ederra izango duzu. Landaketa lan hori uztail-abuztuan egiten da eta ilbeheran.

Arratsalde on, Azelga landatu nuen maiatzaren erdialdera. Ederki sustraitu zen, nire uste apalean; eta berehala hasi zen hosto berde-berde eta ederrak ematen. Baina ez dalit zer gertatzen den, hostoa egiterako, pikor gorrixka batek hartzen du eta dena ximeldu. Zer gertatu da? Zerozer egin dezaket landarea sendatzeko? Pena handia daukat, ikaragarri polita zegoelako eta ikaragarri gustatzen zaigulako azelga. Eskerrik asko laguntzeagatik Arantxa Ihaben-Basaburua

Zerbaren gaitza arrunta da Cercospora onddoak eragina eta zerbaren baztanga esaten zaio. Gori epelak eta hezetasuna dagoenean sortzen da eta kentzen oso zaila da, erraz berritzen baita. Hala ere eraso handiena duten hostoak kendu eta erre. Ondoren azeribuztan ura eta salda bordelesarekin tratatu. Xaboi potasiko eta esne ttantta gutxi batzuk eransteak asko laguntzen du. Tratamendu hori astero errepikatu, batez ere euria edo lanbroa egin aurretik.

Inguruko landetan belar mota barri urtetzen hasi da eta oso bizkor hedatu da, kasu batzuetan belarra desagerrarazi arte Badago modurik aurre egiteko? Beste landare motaren bat, tratetako produkturen bat... Oraintxe ataratako argazkia bialtzen deutzut; Bizkaian bizi gara, Ziortza-Bolibarren Eskerrik asko, ondo izen

Belar hori oso ugaria da hemen. Batez ere mugitutako lurretan sortzen da: bide bazter, betelan eta abarretan. Kentzeko era errazena moztea da. Ipurdi-ipurditik moztu eta berritzen bada berriro moztu. Lan hori eraginkorragoa da ilgoran eginez gero. Uztaileko ilgora 9tik 22 eguerdia arte izango da, eta onena 15etik 20 artean, biak barne. Abuztuan ere ez da txarra; ilgora 6tik 18ra, eta egun onenak 12, 13 eta 14.

Tomate hosto batzuk horixkatzen ari dira eta beste batzuk kiribiltzen.

Ez daude gaizki tomate landare horiek, baina badirudi gorrina sartzen hasia dagoela. Hala bada okerrera egingo dute, hostoak belztuz. Orduan tratatu azeribuztan ura eta salda bordelesarekin. Xaboi potasiko ttantta bat ere erantsi. Egun beroetan egin tratamendua, beti arratsaldean. Eta beste gauza bat, tomatean Euskal Herriaren hego-hegoaldean bizi ez badira behintzat, ez ureztatu. Hortik etorria izan daiteke gaitza.

Tipulak moztuta agertzen dira.Pixkanaka desagertzen doaz.Zer izan daiteke?

Tipula horiek animaliaren batek jan ditu. Izan daiteke satagina edo antzeko karraskariren bat. Bestetik bareak eta karakolak ere jaten dituzte, ez dute oso gogoko baina tarteka jan dezakete. Egitekoa, ahalik eta azkarren lurretik atera eta lehortu eta jaso. Jaten hasita daudenak azkar jan.

Kaixo! Oraindik garaiz al gabiltza babarruna ereiteko?ze egun lirateke onenak?

Normalean ekainaren erdia aldera arte ereiten da. Aurtengo udaberria nola joan den ikusita nik lasai ereingo nuke orain ere. Ez itxaron egun egokiena zein den etortzera. Ahal baduzu gaur bertan erein. Hala ere egun onenak uztailaren 9, 10 eta 11 goiza lirateke.

Arrosa bat landatzeko zelan gelditu behar da injertoa, lurraz estalita ala airean?
Mila esker

Txertoak beti airean geratu behar dira. Lurperatuz gero txertoa alferrik galduko litzateke eta gaineko arrosa klaseak sustraiak botako lituzke, txertua zapuztuz. Gutxienez 5 zentimetro lur azaletik gora utzi txertoa. 

Beti gustatu izan zait Zamioculcas beltz ('Dowon'edo'Raven') batekin aproba egitea . Etxeko landare hau'iritsi berria' da eta 'oso erraza' omen. Lortu izan ditut lakatzetatik penkak ondo sustraitzea baina landatu ondoren hor gelditzen dira ez aurrera ez atzera urteetan. Badakit drenaje ona behar dutela eta baita ura tentuz... ez direla hotz zaleak, ezta oso eguzki zaleak ere... Lurpetik erraboila garatzen dute, baina hasierako penkatik harago ez dut lortzen ganorezko pujek aurrera egitea. Zein da gakoa? trukurik?

ZZ landarea oso mantsoa da. OSO. Hilabeteak igaro daitezke adaxka landatu eta landarearen kimutxo berria ikusi artean. Eta hazkundea, landarea handia egitea ere oso mantsoa da. Beraz hastu lasai… Gakorik ez dago, lortu duzu landaretxoa, eta eman denbora, utzi toki egoki batean (argi asko eguzki zuzenik gabe, ureztaketa tamainan eta haize korronterik ez) eta itxaron… Urteak itxaron landare eder bat nahi baduzu. Agian indartsuagoa izango da landare berriak amaren erraboiletatik sortzen badituzu.  

Kaixo, Zer moduz? Patatarekin lotutako bi galdera ditut: - Goizeko patata jasotzeko egunik onenak noiz dira? Jaso eta leku fresko batean utziz gero ondo mantentzen al da? - Patataren hainbat landarek pisu gehiegi hartu dute eta erori egin zaizkit lurrera. Altxatzen saiatuko naiz lurrarekin menditxoa eginez edo fruitua berdin emango du horrela? Mila esker! Mila esker!

Goizeko patata, goiz egiten delako eta samurra dagoelarik jateko egiten delako esaten zaio. Samurtasun horretan baliatuko ez baduzu jasotzeko bestea bezalaxe tratatu: zarbak ihartzean atera, eguzkitan ondo lehortu, lur arrastoak kendu eta hotza, iluna eta ondo haizeberritzen den toki batean jaso.

Ez da harritzekoa patataren zarba berdea makurtzea. Berezko joera du. Horrek adierazten du zikloaren amaierara iristen ari dela. Aleak berdin emango ditu eta aurrekoan esandako gobernu bera eman, adar horiek ihartzen denean.

Jasotzeko egun egokienei buruz, helburua irautea bada ilbeheran jasotzea komeni da, eta onena sustrai eguna litzateke. Uztaila honetan 1, 2 eta 7 goiza eta gero 29, 30, 31 eta abuztuaren 1 goiza.

Kaixo Jakoba, betidanik porruak ladatu izan ditut eta Portu ederrak lortu ditut bainaasken aldiontan Porruen zuringoan har txikitxoak izaten ditut gainera landarea bihurritxen ditu Ioniz ez dut arozorik izan baina asken urteetan har gainezka izaten ditut , garbitzen ditut jateko baina gero naska asko ematen dit ta noski niretzako ez balldin badira ez ditut oparituko ,beraz,kompoz bihurtzen ditt. Zer egin dezaket arazo hau konpontzeko,Mila esker

Porruaren harra esaten diogu orokorrean. Hala ere porrua barruti jaten duen harra eta kanpotik zulatu eta kizkurtzen duena bereizi beharko genituzke. Lehena aspalditik dugu gure porru sailetan; Acrolepiopsis assectella sitsaren harrak porrua barru-barrutik zulatzen du goitik behera. Bestea kanpoan dabilen euli batek, Phytomyza gymnostoma, jartzen duen arrautzatik sortzen den harra da. Azken hau ikaragarri ugaldu da azken urte hauetan, eta zure deskripzioaren arabera bera dela esango nuke. Hostoak kizkurtu eta makurtu egiten dira. Porruaren azalean koxkor txiki gorri batzuk agertzen dira, negua pasatzeko harrak eratzen duen pupa da, negua pasatzera lurrera eroriko dena. Hortik sortuko da hurrengo urtean euli berria. Porrua bezala, tipulak eta baratxuria ere erasotzen ditu.

Oso zaila da honi aurre egitea. Hasteko azken urteetan porrurik izan ez den sailean jarri landarea. Hasiera-hasieratik intsektuei aurre egiteko tratamentua egin: xaboi potasikoa, Bacyllus thuringiensis eta Neem. Hori zortzi-hamar egunetik behin eman, porruak ondo-ondo bustiz. Bestea eta eraginkorrena euliari igarotzen utziko ez dion sarea jartzea da. Sarearen begiak 0’8 mm baino txikiagoa izan behar du eta nahikoa altu jarri behar da. Hostoaren muturra ukitzen badu saretik barrena jarri bai dezake arrautza euliak. Landatzean jartzea da onena, hasiera hasieran.

Porruak ateratakoan kontuz non uzten diren hondakinak, hor izango baitira pupak. Oiloei eman edo erre.

Lurraren erosioa ekiditeko landare egoki bat landatu nahi degu lur-sailean. Vetiver jartzea ari gara pentsatzen, baina ez dakigu honako egokia ote den, Deba ingururako, bestela zein beste landare izan daiteke egokia? Mila esker!

Vetiver landarea, Vetiveria zizanioides, asko erabiltzen da lan horretarako. Bide ertzetako penditzetan, ur ertzetan, eta abar. Sakontasun handiko sustraijea osatzen du eta urak eraman dezakeen lurrari ederki eusten dio. Ez dut ezagutzen hemen inguruan lan horretarako jarritako vertiver sailik, baino uste dut oso idea ona dela. Saiatu probatu eta esango diguzu.

Ustaua gero eta gehiago zabaltzen hari da. Noiz da ekoparik onena landarea galtzeko mostea. Eskerrik asko

Landareari kalte handiena egiteko ahalik eta energia gehien hostoetan eta zuztarrean dituenean moztu behar da. Hori Ilgoran eta hosto egunean gertatzen da. Orokorrean ilgora osoak onak dira, eta kalte handiena egiteko maiatzekoa, ekainekoa eta uztailekoa baliatu, besterik ezean baita abuztukoa ere. Moztu ahalik eta ugarien, ilgoraero ahal baduzu. Uztaileko ilgora 9tik 22 eguerdira arte luzatuko da eta hosto egunak 16 eta 17 izango dira. Abuztuko ilgora 5 arratsaldetik 18ra arte luzatuko da eta hosto egunak 12 eta 13 izango dira.

Kaixo! baratzeko eremu batean oso lur buztintsua dut, separatzen zaila. Patata daukat orain baina segituan kenduko dut eta lurraren kalitatea hobetzeko ongarritu egin nahi dut. Baratzeko landare hondakinekin egindako pil bat dut ixkin batean eta hori aprobetxatzerik dudan galdetu nahi nizun, nahiz eta ez dagoen ondo ondua. Argazkia bidaltzen dizut. Asmoa hori bota dagoen bezela (galbahetik pasa gabe) eta ondoren patata landarearekin tapatuta uztea da. Ea zer moduz ikusten duzun. Eskerrik asko aldez aurretik!

Luar edo konpost hori ondo dago lurrari emateko, lur ustela esaten zaio. Hala ere egokiena bahetik pasatzea da eta material handitxoak berriko luar pilara bota, hurrengo udazkenera arte utzita ederki desegingo dira. Lur horretan egin nahi duzunaren arabera patata zarbekin estalita uztea ona da, baina egokiena litzateke zarba horiek ere hondakin pilara bota eta hurrengo udazkenean luar bihurtuta erabiltzea.