Astelehenero 8:00etan zure epostan
Urtebetean %0,8 handituta (165 milioi euro gehiago), Espainiako zentral nuklearrak itxi eta hondakin erradioaktiboa tratatzeko aurrekontua 20.367 milioi eurokoa da jada, Enresa enpresa publikoak emandako datuen arabera. Diru-partidaren zatirik handiena (17.520,5 milioi euro) erreaktoreak eraistera bideratuko litzateke; hain justu, 2024 bukaeran, kostu hori kubritu behar duen diru-funtsean 8.677 milioi euro besterik ez zeuden, urtebete lehenago baino %8,4 gehiago, hala ere.
Funts hori Enresak kudeatzen du, eta erreaktoreak martxan dauden bitartean konpainia elektrikoek egindako ekarpenak ditu oinarri. Diru kopuruak %8,4 egin du gora "Enresa tasa" deitutakoa –zeinaren aurka konpainia elektrikoek errekurtsoa jarri duten– %30 hazi ostean.
2024. urteari dagokion Enresaren txostenak jasotako datuei tiraka, Eldiario.es agerkariko Antonio M. Vélez kazetariak dio zentralak eraitsi eta hondakinak kudeatzeko behar den diru-kopurua dela, hain zuen, gobernuaren eta konpainia elektrikoen arteko "lurpeko negoziazioen" gakoetako bat. 2019an, zentralak 2027 eta 2035 artean apurka ixtea adostu zuten bi aldeek, eta hura berraztertzen ari dira gaur egun. Izatez, kazetariak dioenez, "negoziazioak ez dira hala", Trantsizio Ekologikorako ministro Sara Aegesenen hitzetan enpresek nahi dutelako jarduera hori kontsumitzaileek euren gain hartzea, eta gobernuak, ordea, ez.
Otsailaren 28an, aferaz artikulua plazaratu zuen Xabier Letonak ARGIAn: "Espainiako Estatuko zentral nuklearrak itxi ez daitezen aktoreen presioak gora jarraitzen du. Otsailaren 12an Espainiako Kongresuak itxi beharreko zentral nuklearrak ez ixteko eskatu zion Espainiako Gobernuari, eta orain berdin egin dute Endesak eta Iberdrolak. Zentralak ez ixteaz gain, haietatik sortutako energia elektrikoa hobeto ordaintzea ere eskatu dute, bestela zentralak ez direlako errentagarriak. Europan ere berdintsu gertatzen ari dela diote konpainia horiek, eta garrantzitsua dela bermatzea sare elektrikoa 24 orduz izango dela ongi hornitua, besteak beste, energia asko kontsumitzen duten datu zentroak gero eta ugariagoak direlako eta horiek 24 orduko etenbako hornidura behar dutelako.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545