Asteleheneko 00:10ean Richter eskalan 4 graduko lurrikara izan da Araban, erregistroak daudenetik EAEn antzeman den handiena. Epizentroa Iruña Okan izan du, lurrazalean, eta Arabako hainbat txokotan nabaritu da, Gasteiz hiriburuan barne. Mugimendu sismikoak ez du kalte pertsonal edo materialik eragin, larrialdi zerbitzuek jakinarazi dutenez; kalte bakarra hainbat etxebizitza bloke argirik gabe geratzea izan da. Eusko Jaurlaritzako Segurtasun Sailaren arabera, ez da erreplikarik espero, eta "egongo balira, txikiagoak eta herritarrentzat hautemanezinak izango lirateke". Agintariek lasaitasun mezuak helarazi dituzte sare sozialetan.

Epizentrotik, Langraizko alkateak azaldu du "bi kolpe oso gogor" sumatu dituela, "bi leherketa bezala". Dardaren ondoren, abisua herritarren telefono mugikorretara iritsi da, nola jokatu behar den jakiteko gomendioekin. Euskal Herriko beste zenbait tokitan eta Errioxan ere nabaritu dute lurrikara.

Adituen arabera, ez da batere ohikoa Araban halako lurrikarak izatea, ez baita zonalde sismiko garrantzitsu bat; Euskal Herrian erregistratzen diren dardara gehienak Nafarroan izaten dira. Oraingoan, ezagutzen ez zen faila bat aktibatu omen da, bat eta bi kilometro arteko luzerakoa, eta etorkizuneko ikerketei atea irekita utzi beha zaiela iradoki dute adituek. Lurraldean antzeko dardarak izan ziren 1967ko abuztuaren 13an eta 1817ko martxoaren 18an.

Japonian 7,6 graduko lurrikara

Astelehenean ere lurrikara batek Japoniako iparraldea astindu du. 7,6 gradukoa izan da, eta  hainbat zauritu izan dira. Agintari meteorologikoen arabera, dardararen epizentroa Aomori prefekturako kostaldearen aurrean izan da, artxipelagoaren ipar-ekialdean, 50 kilometroko sakoneran. Horrek tsunami arriskua ekarri du eta Japoniako Meteorologia Agentziak (JMA) alerta ezarri du 3 metrorainoko tsunami arriskuagatik. Ondorioz, 23.000 lagun inguru ebakuatu dituzte, badaezpada ere. Hala ere, astearte goizean jakinarazi dute tsunami alerta bertan behera utzi dutela, baina agintariek alerta berezia aktibatu dute datozen egunetan ezohiko lurrikara bat izateko arriskua dagoelako.