Goizeko 9:30ean hasiko da eguna ongi-etorriarekin, eta 10:00etan ekinen diote agroekologiako antolaketa kolektiboko esperientzien inguruko mahai-inguruari. Baztango Eztibeltza kooperatibak, Izurtzako Eskubaratz elkarteak eta Bergarako Ereindajan kooperatibak hartuko dute parte lehen ekitaldi horretan. 12:00etan, berriz, erreleboaren inguruko solasaldian izanen dira Errigoitiko Bizkaigane kooperatiba, Baztango Xurie proiektua eta Anoetako Sarobe baserria. “Hausnarketarako eta beste esperientzietatik elikatzeko aukera izanen dugu goizean, hain justu, Amillubin ere etorkizunera begira zein proiektu eta nola gauzatuko diren pentsatu beharko dugu-eta”, gehitu dute.

Eguerdiko bazkaria eta gero, arratsaldean, festa giroa nagusituko da: poesia musikatua, bakarrizketa, Elektropottotte elektrotxaranga, La Jodedera musika taldea eta DJ Kurkubit ariko dira, eta haurren txokoa eta ipuin kontalaria ere izanen dira. “Publiko guztiarentzat plan aproposa izan daitekeela uste dugu, bai agroekologia gertutik ezagutu edo bizi duenarentzat, baita beste edonorentzat ere”, diote.

Amillubi proiektura eta agroekologiara gerturatzeko modu bat izan daiteke udaberriko hitzordua, antolatzaileen ustez, eta haurrekin joateko ere aukera ederra. Nabarmendu dutenez, eguneko otorduak eta barra bertako osagai agroekologikoz hornituak egonen dira. Nola bestela?

Festarako soroa txiki gelditzea, seinale ona

Ospakizuna Amillubin bertan izanik, askorentzat tokia ezagutzeko aukera izanen da festa. “Iaz lurrak oraindik ez ziren lantzen ari, orduko festan egon zirenek urte batean egon den aldaketa ikusiko dute. Aurten ezingo dugu festa toki berean egin, garia eta porrua ereinda egonen direlako orain… baina, tira, hori seinale ona da”, diote.

Amillubi baserria eta lurrak ordaintzeko diru-bilketarekin segitzen du proiektuak oraindik, eta festaren helburu nagusia hori izan ez arren, sos pixka bat egiteko ekimena ere proposatu dute: nekazaritza tresnen eta produktuen bigarren eskuko azoka. 12:00etatik 19:00etara izanen da hori, eta 14:00ak arte egonen da materiala dohaintzan emateko aukera.