Oiartzungo Burujabetza Eguna ospatu zutenekoa, 2024an.

Oiartzungo bost ekoizpen proiektu animatu dira egitasmoan parte hartzera, abeltzaintzari lotutako hiru eta nekazaritzan diharduten bi. “Auzolan praktikak uztailaren 1etik 31ra izanen dira. Hasteko, ikusi nahi genuen zer moduz funtzionatzen duen honek hilabete bateko formatuarekin, eta gerora, baloratuko dugu zein aukera dauden”, azaldu du Iñigezek. Bost etxaldeetan aritzeko bost lagun hartzea da hasierako asmoa, baina izen ematearen arabera, hilabete osoko praktikak izan beharrean hamabost egunekoak izatea eta txanda gehiago antolatzea da aztertzen ari diren beste aukera. Izan ere, izen-ematearekin pozik agertu dira, egitasmoak erantzun ona izan duelako: “Kontent gaude, jende dezentek eman baitu izena, eta profil desberdinetakoak dira gainera”. Zentzu horretan, sorpresa polita hartu dute antolatzaileek. Praktika ordainduak izanen dira, eta aurtengo kasuan udalak proiektura bideratutako diru partidaren bidez ordainduko diete auzolangileei.

Hasiberriei zuzenduta, batik bat

Praktikak ia edonorentzat irekiak direla adierazi du antolatzaileak: “Oiartzungo edonori zuzendutako praktikak dira, eta bereziki pentsatua dago aldez aurretik lehen sektoreaz ezer ez dakiten horientzat. Azkenean, praktikak dira, eta helburua ofizioa ikastea da”. 16 urtetik gorakoentzat zuzendu dute, eta bereziki gazteei zuzendutako egitasmoa izan arren, ikusi dute adin guztietako jendearen interesa piztu duela proiektuak.  

Astelehenetik ostiralera izanen dira auzolan praktikak aurtengo proiektu pilotuan, egunean sei bat ordukoak. “Helburu bikoitza duen egitasmoa da: auzolangileek ofizioa ikastea da asmoa batetik, baina, bestetik, nekazariek ere ikusten dute haien lana neurri batean arriskuan dagoela etorkizunera begira, eta beraz, etorkizuneko nekazari eta abeltzainei laguntzeko modu bat ere bada”, amaitu du.