Izotzetan eta elurretan, abenduko gau luzeetan.

“Mugimendua kriminalizatu eta aurrekari bat jarri nahi dute epaiketa honekin, hori oso larria da”

Lekarozko Aroztegia makroproiektu urbanistikoaren aurkako zazpi ekintzaile epaitegietara bidali ditu Palacio de Arozteguia S.L enpresak. 56.000 euroko isunak eta, guztira, 20 urteko kartzela zigorra eskatu dituzte haientzat. Azaroaren 26an prentsaurreko jendetsua egin dute Lekarozko frontoian, eta auzipetuei babesa emateko manifestazioa iragarri dute Iruñean otsailaren 1erako. “Talde kriminala garela diote, baina hori gezurra da, momentu jakin batean gu hor ginela esateko frogarik ez dutelako asmatu dutena”, salatu du Garbiñe Elizegik, zazpi auzipetuetako batek. ARGIAko Egonarria saioko abenduaren 4ko gonbidatua izanen da lekaroztarra.

Garazi Zabaleta
Garazi Zabaleta

2016tik ARGIAn astero esperientzia baten berri ematen du.


2024ko azaroaren 27a
Mundu bizigarriago bat eta bizitza gozagarriago bat egunero lantzen dugunon komunitateak eusten dugu Bizi Baratzea. Horregatik jartzen ditugu sarean eduki denak libre, Lurrari begiratzen eta entzuten diogunak gero eta gehiago izan gaitezen. Batu komunitatera. EGIN BIZI BARATZEAKOA.

“Oso larria da akusazioa, herri mugimendua kriminalizatu eta aurrekari bat jarri nahi dutelako. Lehen dena bazen terrorismoa, orain, talde kriminalak dira”, adierazi du Elizegik. Baztandarrak azaldu duenez, egon da akordiorako aukera azken hilabeteetan, enpresaren abokatuak, auzipetuenak eta fiskaltza negoziatzen ibili baitira. “Egin genuena onartzeko prest agertu gara gu: makinen aurrean jarri ginela herritar gehiagorekin batera. Baina, talde kriminalarena marra gorria da guretzat”, azaldu du. Izan ere, auzipetuek uste dute "talde kriminal" gisa izendatu nahi dituela enpresak, Nafarroako eta Espainiako Gobernuen kontra jarrita dituen bi demandengatik. “Akanpada garaian enpresa babesteko nahikoa baliabide jarri ez izana leporatzen die gobernuei, eta horretarako, gure ‘talde kriminal’ izaera hori behar du”, dio.

"Aldatzen dira gobernuan dauden alderdiak, baina segitzen du kartzelaren mehatxuak eta proiektuen inposizioak, eta honi deitzen diote demokrazia”

Egitasmoak Udalaz Gaindiko eragineko Plan Sektorial (UGPS) gisa izendatuta Nafarroako Gobernua egiten ari den triskantza ere salatu dute auzipetuek. “UPNk proiektu asko inposatzeko erabilitako bide hori aldatuko zuela adierazi zuen 2015ean ‘aldaketaren gobernuak’, baina gaur da eguna formula hori erabiltzen segitzen dutena”, gogorarazi du. Aroztegiko proiektuarekin, gainera, pauso bat harago joan izana ere salatu du baztandarrak, "foru intereseko" egitasmo gisa izendatuta tramitaziorako erraztasun gehiago dituztelako proiektuek, Erdizko harrobiak kasu. “Formula horren kopia egin dute erkidegoan Tapia Legearekin. Gobernu desberdinak dira, aldatzen dira alderdiak, baina segitzen du kartzelaren mehatxuak eta proiektuen inposizioak, eta honi deitzen diote demokrazia”, salatu du.

Mobilizazioetan parte hartzeko deia

Epaiketa otsailaren hasieran izanen dela aurreikusten dute akusatuek, data hori eman diete, momentuz. Horregatik, datozen aste eta hilabeteetan mobilizazio eta ekimen desberdinak eginen dituztela iragarri dute, eta azpimarratu dute behar beharrezkoa izanen dela herritarren babesa. “Argi dugu hau ez dela gure aurkako zerbait konkretua, herri oso baten kontrako erasoa da. Orain arte herritarren babesarekin egin badugu aurrera, orain ere horrela eginen dugu, elkarrekin eta modu kolektiboan”, azpimarratu du.

“Gure lurrak kapitalaren esku uzteko estrategia orokorra dago honen atzean, eta beraz, estrategia nazionala izan behar luke honi erresistentzia egitea”

Izan ere, makroproiektu hau Baztanen kokatua izanik ere, nabarmendu du Euskal Herri mailan gertatzen ari diren beste ingurumen borroka askorekin lotura zuzena duela. “Gure lurrak kapitalaren esku uzteko estrategia orokorra dago honen atzean, eta beraz, estrategia nazionala izan behar luke honi erresistentzia egitea”, amaitu du Elizegik.

Auzolan praktikak herriko nekazari eta abeltzainekin
2025-06-30 | Garazi Zabaleta
Burujabetzan sakontzeko egitasmoa da Oiartzun Burujabe proiektua, udalaren, herriko ehun ekonomikoaren eta herritarren artean bultzatu dutena. “Oiartzungo herritarrek bertako baliabideak eta produktuak, bertan ekoizten dena... (+)
Bertako ahuntz arrazaren txorizoak
2025-06-23 | Garazi Zabaleta
David de Blasek abiatutako proiektua da Azpigorri Ahuntz Txorizoak, eta izenak argi uzten duenez, azpigorri arrazako ahuntzekin ari da lanean. “Urteetan industrian aritu nintzen lanean,... (+)
“Bizirik dagoen landarea duzu ahoan ernamuin bat jatean”
2025-06-16 | Garazi Zabaleta
Hamabost urte baino gehiago daramatza martxan Bizkaiko Kimuak ernamuinduen proiektuak, baina hasierako bultzatzaileak erretiratu dira eta erreleboa hartu berri dute Mikel Landa Luzarragak eta Asier... (+)
Nafarroako ekoizle eta artisauen azoka berria Iruñeko Basotxoan
2025-06-09 | Garazi Zabaleta
Ekoizleen eta kontsumitzaileen arteko zuzeneko harremanak sustatzeko asmoz azoka berria jarri du martxan Iruñeko Udalak, INTIA-Reyno Gourmetekin, Nafarroako Nekazal Produkzio Ekologikoaren Kontseiluarekin (NNPEK), Elikagai Artisauen... (+)
“Metalezko bastoiak ikusten dira orain, baina hurritz makila betiko erreminta izan da gurean”
2025-06-02 | Garazi Zabaleta
Umetan aitarekin ikasi zuen Unai Zabala Zubelzu txaramarrak hurritz makilak egiten. “Perretxikotara joaten ginen bezala, makilak egitera ere ateratzen ginela gogoratzen dut, hamar bat urte... (+)
gora