Amaitu berri den ekaina erregistroak daudenetik beroena izan da, Euskalmetek argitaratutako txostenaren arabera. Hilabeteko tenperaturak "oso beroak izan dira" eta hezetasuna protagonista izan da batez ere Gipuzkoa ekialdean. Aurtengo batez besteko tenperaturak, 1991-2020 aldiarekin konparatuta, 3,1 gradu igo dira. Horren aurrean 25 abisu eman ditu Euskalmetek, horietako bi alerta laranjak. Munduko Meteorologia Erakundeak dio herritarrak tenperatura altuetara "ohitzen ikasi" behar dutela, gero eta normalagoa izango baitira bero boladak. 

Ehunka hildako Europan

Instituzio publikoek argitaratzen dituzten datuak ez direla guztiz zehatzak salatu zuen Greenpeacek, muturreko beroak eragiten dituen heriotzak hildakoek zituzten bestelako osasun arazoekin lotzen dituztelako. Muturreko beroak osasun arazo horiek areagotu egiten ditu eta beraz, "zaila" da erregistro ofizialek eskaintzen duten irudiarekin beroaren inpaktua neurtzea.

Datu zehatzagoak lortzeko MoMo sistema sortu zuen Espainiako Estatuko Osasun Ministerioak tenperaturak berak eragindako heriotzak ezagutzeko. Horren arabera, ekainean tenperatura dela eta 407 pertsona hil ziren Espainiako Estatuan. Adina faktore erabakigarria da MoMoren sistemaren arabera, hildakoen %97ak 65 urte baino gehiago baitzituen.

Frantziako Estatuan 300 pertsona baino gehiago artatu dituzte suhiltzaileek eta 1.300 ikastetxe inguru itxi dituzte. Italian aire zabalean lan egitea debekatu zuten 47 urteko langile baten heriotzaren ondoren.

Europako hainbat puntutan alertan daude oraindik baina tenperaturak leuntzen joango dira hurrengo eguneetan.