Sakana Bizirik plataformaren aurkezpena Altsasun.

“Bizitzaren eta lurraldearen defentsan aritutako tradizio luze baten parte” direla dio plataformak eta erraustegi proiektu honek kapitalismo suntsitzailearen logikari erantzuten diola, “zeinak ‘aurrerapenaren’ eta ‘garapen ekonomikoaren’ izenean proiektuak inposatzen dituen, gutxi batzuen mesedetan eta gehienen bizitzak kaltetuta”.

Oso aspaldikoa da enpresa horrek hondakinak erretzeko duen asmoa, eta hainbat hondakin atalen errausketa egiteko baimenak lortu izan ditu lehenago ere, hala nola biomasa erretzeko. Jadanik 2013an UPNk gidatzen zuen Nafarroako gobernuak baimendu zizkion birziklagarriak ez diren hondakinak erretzea, baina ahaleginak lehenagokoak ere badira, eta Sakanako herritarrek beti erakutsi izan diete oposizio handia gisa horretako proiektuei.

2010eko hamarkadaren lehen urteetan, CPVren esanetan hondakinak erretzea ezinbestekoa zen “petrolio kokea ordezkatzeko, CO2 gutxiago isurtzeko eta lehiakorrago izateko”. Errausketaren kontrako taldeek beti salatu dute enpresaren azken helburua era denetako hondakinak erretzea zela, biomasa, industriala zein etxeetakoa. 2011ko uztailean, esate baterako, “Altsasun inoiz egin den manifestaziorik handiena burutu zen, eta 3.000 lagun bildu ziren CPVren errauste egitasmoaren aurka”, kontatzen du Urko Apaolaza ARGIAko kazetariak gaiaz egindako erreportajean. Sustrai Erakuntzak 2024ko urteko txostenean azaltzen duenez, enpresak berriz abiarazi du erraustegi bihurtzeko proiektua eta elkarteak alegazioak jarri dizkio.

Irailean, proiektuari berriz ateak ireki dizkion Nafarroako Gobernuaren baimena lortu zuen CPVk eta asmoak aurrera egingo balu, “horrek arrisku larriak ekarriko lituzke bai pertsonen osasunean, bai ingurumenean”, diote plataformatik. Azaldu dutenez, Carlos Slim mexikar aberatsa da CPVren egungo jabea, eta ez dute ulertzen gobernuak nola eman dion baimena errausketa ahalbidetuko lukeen proiektu honi , horrek arrisku larriak ekarriko dituelako bai pertsonen osasunerako, bai ingurumenerako: “Bazirudien etapa hori gaindituta zegoela, enpresak ulertu zuela bizikidetza herrien borondatea errespetatuz bakarrik zela posible. Baina kapitalak ez du mugarik ezagutzen”.

Sakana Bizirikek dioenez, “mehatxu hau ez da gertaera isolatu bat” eta horren erakusle dira Sakana zeharkatu nahi duten AHT proiektua eta goi-tentsioko linea: “Kapitalismoaren estrategia global baten parte da, mugarik gabe ustiatzeko, kontsumitzeko eta xahutzeko, eta horrek lurralde osoak degradaziora kondenatzen ditu”.