Terueleko (Espainia) Virgen de la Vegako pista

2024ko udaberrian hasi ziren proiektuarekin bueltaka eski estazioan eta arduradunek Akitania Berriko erakundeen 76.000 euro ere lortu zituzten proiektuak aurrera egin zezan; guztira, 372.000 euroko inbertsioa egin behar zuten.

Akitania Berriko Alderdi Berdeak hasieratik erakutsi zuen asmoarekiko desadostasuna eta urte eta erdi honetan haren aurka aritu da. Azken urteetako joerarekin, eski estazioek gero eta arazo handiagoak dituzte elur eskasiarekin, eta honen gisako proiektu surrealistak plazaratzen dira pistan eskiatzeari eusteko.

Proiektuaren aurka aritu den Alderdi Berdeko Jean-François Blanco erregio hautetsia pozik agertu da erabakiarekin: “Berri ona da urtea hasteko”. Plastikozko pistaren aurkakoen ustez, zentzugabea da nola hala eta edozeren gainetik goitik behera mendian labaindu behar hori, eta nola hala amaitu behar da mendiak barrakak edo jolas parke bihurtzeko dagoen joera horrekin.

Blancok dioenez, “epe ertainera eski estazioen eredua agortuta dago. Beste eredu bat topatu behar da, horrenbeste baliabide publiko xurgatzen duten eski estazioen eredutik atera ahal izateko. Ezin ditugu natur guneak erabili jolas guneak eraiki eta mendiak artifizialtzeko. Artzaintza zaindu behar da, natur gune basatiak eta paisaia bikainak. Horiek egiten dituzte mendiak benetan erakargarri”.

Erreporterre-n azaldu da albistea eta Jean-Chistophe Lalane Artousteko estazioko zuzendariak bertan azaldu duenez, oraintsu amaitu dute beren karbono-aztarnaren azterketa. “Konturatu ginen gomazko pista hori zapaltzeko makina berezia erosi behar genuela, eta horrek gure deskarbonizazio ibilbidea zalantzan jartzen zuen”. Dioenez, trenak ematen die diru sarreren %80a eta gainerakoa eskiak eta bestelako jarduerek, erdi eta erdi gutxi gorabehera.

Europako hainbat lekutan jarri dira edo jartzen ari dira plastikozko pista hauek, baina ez da segurua oraindik nola garatuko diren. Sarean bilaketa eginda plastikoan eskiatzea zer den ikusi dugu, adibidez Espainiako Teruel probintziako Alcala de la Selvako pista honetan, estatuko lehena.