Manifestazioa egin dute igandean Muskiz eta Abantoko herritarrek, ostegunean Petronorren plantan izandako bentzeno isuria eta findegiak bizilagunei eragin diezazkiekeen osasun arazoak salatzeko. Muskizko udaletxetik abiatu da manifestazioaren zutabe bat, Meatzaldea Bizirik taldeak deituta; bestea, Abantoko Las Carreras auzoko Trinitate plazatik, Stop Variante plataformak deituta. Biek egin dute bat Petronorrek Muskizen duen findegiaren inguruan, eta bertan herritarrek euren ezinegona erakutsi dute "Meatzaldea ez dago salgai", "Petronor, aski da" eta "Gu hiltzen ari zarete" leloak erakutsi bitartean. Izan ere, ez da Meatzaldeako bizilagunek halako istripu baten ondorioak jasan behar izan dituzten lehen aldia. Azken hau, “urak gainezka egiteko falta zen tanta” izan dela esan dute. 

Eusko Jaurlaritzak zabaldutako bertsio ofizialaren arabera, “gorabehera” bat izan zen gasolina depositu batean, eta ondorioz bentzeno isuria izan zen. Hori goizean gertatu bazen ere, Eusko Jaurlaritzak gauera arte ez zuen eman etxetik ez ateratzeko gomendioa. Bitartean, bizilagunek gai kutsakorrak arnastu zituztela agerian utzi dute agerraldian.

Zeresana ematen ari da findegia azkenaldian. Abenduan, kontu bera: gasolina depositu batean izandako istripuak bentzeno mailak nabarmen igotzea ekarri zituen; eta azken istripu hau baino asteburu bat lehenago ke laino beltzak eragin zituen Muskizen argindar eten batek.

Bizilagun asko haserre dago, eta agintariengan jarri dute erantzukizuna. Meatzaldea Bizirik taldeak, hartu beharreko neurriak “berandu” hartzeaz gain, gardentasun eza ere salatu du. Manifestazio amaierako irakurketan, adierazi dute administrazioak “ezikusiarena” egiten duela, gertakariei “garrantzia kentzen” diela, ez duela “enpresa zigortzen” eta ez duela “gardetasunez informatzen".  Halaber, osteguneko isuria berriro ez errepikatzeko "beharrezkoak diren neurriak" hartzeko eskatu diote Jaurlaritzari.