Abeltzainen kezkak Labore Oarsoko helburuekin –gertutik elikatzea, ekoizle txikiak eta lehen sektorea bultzatzea eta lanbidea duintzea, besteak beste– gurutzatzen zirela ikusita, proba pilotua abiatzea erabaki zuten. “Abeltzainekin joko arauak adosten aritu gara, Laboretik haragi hori merkaturatzeko baldintzak zehazten eta ardurak banatzen”, dio Larretxeak. Oiartzungo haragia sartuko da proiektuan, pentsu eta elikadura ekologikoarekin eta hormona, transgeniko eta botikarik gabe hazitako aziendena. Animaliei tratu ona ematea ere adostu dute irizpideetan.

Herriko abeltzain gehienak ez dira profesionalak eta askori errespetua ematen zien etxerako egitetik saltzera ere pasatzea. “Denon artean aritu gara planteamendua adosten, abeltzainentzat erosoa izanen den jokalekua sortzen eta haien kezkak kontuan izan ditugu”. Horrela, erabaki dute abeltzainek hazi eta gizendutako aziendak Labore Oarsori salduko dizkiotela, eta hauek arduratuko dira hiltzeaz, eraldaketaz eta merkaturatzeaz. “Martxoaren 11n jasoko ditugu lehenengo haragi-loteak, eta hemengo bazkideek eskuratzeko aukera izanen dute, baina gerora bazkide ez diren herritarrei ere zabalduko zaie”. Oraingoa abeltzain batekin egiten ari diren proba pilotua da, eta behin emaitzak eta datu ekonomikoak eskutan dituztenean, herriko gainerako abeltzainei aurkeztuko dizkiete, gehiago zabaltzeko. “Hainbat abeltzainek adierazi dute interesa”, dio.

Loteak enkarguz

Momentuz txahal haragiarekin ari dira probak egiten, baina aurrera begira beste haragi batzuk ere egitasmoan sartzea nahi lukete. Haragi-loteak freskoan salduko dituzte, enkargu bidez, baina beste batzuk izoztuta ere salduko dituzte dendan. “Egoera prekarioan eta desbalorizatuta egon den sektorea da abeltzaintza eta etsipena nagusitu da, baina sinetsita gaude horrelako proiektuak elkarlanean sortuta, egitura kolektiboak bultzatuta eta abeltzainak ere subjektu aktibo bihurtuta, lana duindu daitekeela”. Baina horretarako ezinbestekoa izanen da herritarren kontsumo ohiturak aldatzea eta preziotik harago, erosketekin bultzatu nahi denaren gaineko kontzientzia hartzea.