Larrialdi Zerbitzuak lanean Pasaiako (Gipuzkoa) portuko sutea itzaltzeko.

Iragan ortziralean sutea izan zen Pasaiako portuan, txatarra biltzen duen enpresa batean, eta Lezo inguruko herritarrak konfinatu zituzten, keak “osagai toxikoak” izan zitzakeela argudiatuta. Handik ordu gutxira bizilagunei euren etxetik ateratzen utzi zieten, Osasun Publikoak airearen kalitatearen neurketak egin, eta "balio normalak" eman baitzituen. 

Ez da lehendabiziko aldia izan ordea; Eguzki kolektibo ekologistak ARGIAko Eragileen plazan salatu du aurrekariak egon badaudela: “Zoritxarrez, ez da lehen aldia; txatar-tontor baten aurreko sutea 2018ko abuztuan gertatu zen, eta orduko ke zutabea Donostiatik eta harantzago ikusi zen”. Gertakari hori argitzeko, prozedura judizial bat ireki zuten, baina Eguzkik gogorarazi du oraindik ez dituztela “izapide horien emaitzak ezagutzen”.

Oraingo honetan, berriz, talde ekologistak erakundeei exijitu die horrelako gertakariak saihesteko “behar diren neurriak” hartzeko. Gainera, ohartarazi du arazoa ez dela suteetara mugatzen: “Pasaiako portuaren inguruko biztanleei egunero eragiten diete portuko zamalanetan askatzen diren partikula esekien emisio barreiatuek”. 

Eguzkiko kideen arabera, emisio horiek herritarren osasunari eta ingurumenari egiten diete kalte. Hortaz, baldintza egokiak bermatu ezin badira, proposatu dute lan horiek “hirigune handietatik urrun dauden portu instalazioetara” eramatea.

Instituzioen erantzukizuna

Eguzkik “agintari eskudunei ekintza gabezia” leporatu die: “Atmosfera kutsa dezaketen jarduera horien kontrol eta zaintza falta da horrelako gertakariek sortzen dituzten ondorioen arrazoi nagusia”. Halaber, gainerako administrazioei ere egotzi die erantzukizunaren zati bat, agintariei babes neurriak hartzeko “presiorik ez egiteagatik”.

Hala, kolektiboak erantzun instituzional bat eskatu du; ez soilik sute bat gertatzen denean horri aurre egiteko, baizik eta txatarra biltegiratzeko, eta Pasaiako portuko jarduerak eragindako emisioei modu iraunkorrean heltzeko.

Herritarrak, kezkatuta

Azken sutearen harira, herritarrek elkarretaratzea egin dute ortziral arratsaldean. Portuaren etekinak lezoarron osasunaren kontura? Ez! lelopean bildu dira Lezoko udaletxearen aitzinean. Salatu dute portuan lan egiten duten enpresak “herritarren osasunaren kontura” aberasten direla, eta neurriak hartzeko eskatu diete agintariei.