Atacaren traktore martxa Gasteizen, ortzegunean.

Trebiñu eta Araba Landaren Alde elkarteak (Ataca) deituta, dozenaka nekazari eta abeltzainek protesta egin dute Gasteizen, ortzegunean: 30 bat traktore abiatu dira Buesa Arenatik, eta Eusko Jaurlaritzako egoitzaren aitzinean amaitu dute ibilbidea. Elkarretaratzea egin dute bertan, eta erakundeei eskatu diete Araba, Bizkaia eta Gipuzkoa “lehorte eremu” izendatzeko, baita lehen sektoreari laguntzeko “berehalako neurriak” hartzeko ere. 

Arabako lehen sektorearen gehiengoa ordezkatzen duen taldeak, UAGAk, ez du mobilizazioan parte hartu, Jaurlaritzarekin “negoziatzen” ari baita. Atacaren ustez, ordea, erakundeekin hartu-emanak astiroegi doaz, eta protesta egitera ateratzea erabaki dute, landa eremuaren “muturreko egoera” salatzeko.

Hain zuzen, Atacako presidente Raul Beitiak eman du landa eremuaren egoeraren berri: “Inoiz ez dugu horrelako egoerarik ikusi: uztailetik bertatik larreak eta mendiak lehor-lehor eta belarrik gabe egotea”. Egoerak nekazariak zuzenean kolpatu ditu, lehorteak zekaleen uztari eragiten baitio.

Hala ere, Beitiak azpimarratu duenez, abeltzainak dira kaltetuenak: “Abereek ez dute zer jan, eta abeltzainek agortu dute jada negurako gordeta zeukaten bazka. Abeltzaintza mota guztiei egingo die kalte egoera honek; kontu larria da”. 

Eusko Jaurlaritzako Nekazaritza Sailak egindako inkesta batean, erraterako, abeltzainen %87k adierazi dute aurten aitzineko urteetan baino bazka gutxiago jaso dutela. Belar gutxiago jaso dutenen artean, batez bertze, erdira jaitsi da bildutako belar kopurua. Beroak eta bazkarik ezak esnearen ekoizpenari ere eragin dio, abere bakoitzak 5-7 litro gutxiago ekoitzi baititu.

Prezioek goiti, laguntzek ez

Nazioarteko egoera ezegonkorrak eta gerrek are gehiago estutu dute lehen sektorea: gasolinaren eta ongarriaren prezioa etengabe ari da goititzen, eta horrek ataka larrian paratu du lehen sektorearen errentagarritasuna. Egoera horri aitzin egiteko, Araba, Bizkaia eta Gipuzkoa “lehorte eremu” izendatzeko eskatu dio Atacak Eusko Jaurlaritzari: “Izendapen horren bitartez, nekazari eta abeltzainei errazagoa izanen zaie zuzeneko laguntzetara iristea”.

Era berean, elkartea kritiko agertu da bertze behin Mercosur bezalako merkataritza itunekin. Joan den urtarrilean protestak egin zituzten itun hori bertan behera uztea eskatzeko; ez zuten lortu ordea, eta ortzegun honetan Atacak adierazi du anitz ugaritu direla Europatik kanpoko bertze herrialdeetatik datozen ekoizpenak. Hortaz, elkarteak erakundeei eskatu die sektorea babesteko, eta inportazioei Europako nekazari eta abeltzainei eskatzen zaizkien estandarrak bete ditzatela exijitzeko.

Burokraziarekin, borrokan

Azkenik, burokraziarekin borrokatzen pasatu behar dituzten orduen korapiloa askatzeko ere aldarrikatu du Atacak traktore martxan. Erakundeak salatu duenez, betebehar administratiboen ondorioz, sektoreko profesionalek gero eta ordu gehiago eman behar dituzte izapide informatikoetan eta dokumentazioan.