Basogintzaren egoera salatzeko 2025ean egindako elkarretaratzea, Iruñean.

Azken asteotan lanean izandako bertze hiru heriotzaren berri eman du LABek. Basogintzan lanean ari zen 44 urteko langile bat hil da asteazkenean Azkoitian (Gipuzkoa), enbor bat gainera erorita. Eusko Jaurlaritzako Segurtasun Sailak jakinarazi duenez, ezbeharra 14:30ean gertatu da. Bertze bi heriotzak ere Gipuzkoan izan dira: garraiolari bat hil da uztailaren 23an Idiazabalen, eta bertze bat uztailaren 30ean Oiartzunen. Sindikatuak ez du xehetasun gehiagorik eman azken bi heriotza horien inguruan.

LABek nabarmendu du basogintzan eta zein garraioan dituzten “lan baldintza txarren ondorio” direla aipatutako heriotzak: “Lan baldintza gogorrak, ekoizteko presioa, prebentzio neurri eskasak, eta administrazioen kontrol falta behin eta berriz agertzen dira laneko heriotzen atzean”.

Basogintzari dagokionez, LABek salatu du sektore horrek laneko ezbehar tasa altuenetakoa duela, eraikuntza sektorearena baino hamar eta hamabost aldiz artean handiagoa, hain zuzen. Zehazki, urtero batez bertze bi eta hiru langile artean hiltzen dira istripuz Euskal Herrian.

Sindikatuak gogorarazi du sektore horretako egoera salatu zuela 2024an Gipuzkoako Batzar Nagusietan egindako agerraldi batean, eta han “aldaketak” eskatu zituela ustiaketa moduetan, prebentzioan, ikuskaritzan, eta kontrol publikoan. Azkoitiko istripuak, ordea, erakusten du arazoak “bere horretan” dirauela, LABen arabera. 

Hortaz, sindikatuak zenbait neurri mahaigaineratu ditu arazoari aurre egiteko: “Gipuzkoako Lan Ikuskaritzak ikuskari kopurua eta kontrolak areagotu behar ditu; Osalanek prebentzioaren arloko jarduera indartu behar du; eta Gipuzkoako Foru Aldundiak, bere eskumenen baitan, basogintza ustiaketa arloan, ezin du beste alde batera begiratzen jarraitu”. LABek ohartarazi du “erakunde guztiek dutela erantzukizuna lan baldintzak hobetzeko eta laneko heriotzak prebenitzeko”.

39 hildako

LABek egiten duen zenbaketaren arabera, aurten dagoeneko 39 pertsona hil dira lanean Euskal Herrian. Idiazabalgo eta Oiartzungo bi heriotzak batuta, gutxienez sei dira garraiolariak. Sindikatuak uste du datu horrek agerian uzten duela sektore horrek duen egoeraren larritasuna.