Astelehenero 8:00etan zure epostan
Hauek dira akordioa egin duten herrialdeak: Alemania, Austria, Danimarka, Herbehereak eta Grezia. Paperik gabeko etorkinak "behin-behinean" kanporatzea dute helburu, eta hori ontzat jo du Europako Batasunak.
Europako Batzordearen egoitza.
Ruandako Gobernuarekin egin dute akordioa, eta bertan eraikitzekoa dute deportazio zentroa. Christian Stocker Austriako kantzilerrak argiki erran du: "2027an lehen itzultze esparrua eraiki asmo dugu Ruandan". Astelehenean Vienan egin dute agerraldia herrialde sinatzaileek, eta han eman dituzte proiektuaren nondik norakoak. Helburua "egoera irregularrean" diren etorkinei asilo eskubidea ukatu ondotik Ruandara igortzea da, behin betiko kanporatze prozesua bukatu arte.
Erabakia arrazoitzen entseatu dira buruzagiak, eta Mette Frederiksen Danimarkako lehen ministro sozialdemokratak gaur egungo asilo sistema "sostengaezin eta gizagabe" gisa kalifikatu du, eta horregatik eskertu du proiektu berria. Danimarkarrak gehitu du bidaliko diren etorkinen kopurua ez dela hain garrantzitsua, eta inportanteena "mezu" bat igortzea dela: "Erakutsi nahi duguna da jada ezingo dela Europara legez kanpo sartzen segitu". Era berean, Europako Batzordeko bozeramaile Markus Lammertek ere erabakia txalotu du, "EBren itzulketa sistema ahalik eta eraginkorrena izatea lehentasuna da batzordearentzat", erranez.
Vincent Biruta Ruandako Barne ministroak erabakia baieztatu du, nahiz eta espero duen deportazio horiek "aldi baterako izatea". Horren harira zera erran dute sinatzaileek: helburua etorkinak beren jatorrizko herrialdeetara igortzea dela, Ruandak ez ditzan "milaka migrante hartu".
Zentroa eraikitzeko Ruanda hautatzeak, ordea, eztabaida areagotu du. Ekainean bozkatutako EBren Migrazio eta Asilo Itun berriak deportazio zentroen eraikitzea baimentzen zuen, baldin eta herrialde hartzaileak giza eskubideen inguruko nazioarteko legedia betetzen bazuen. NBE eta besta hainbat erakunderen arabera, alta, Ruandak ez du hori betetzen. Izan ere, salatu izan dute herrialdeak prentsa eta adierazpen askatasunak mugatzen dituela, eta oposizioko kide eta giza eskubideen aldeko ekintzaile batzuk atxilotu ere dituela.
Etorkinen kanporatzeko antzeko akordio bat egin zuten Ruandak eta Erresuma Batuek 2022an. Erabakia azkenean atzera bota zuen Erresuma Batuko Auzitegi Gorenak, herrialde hartzaileak giza eskubideak urratzeko arriskua zuelako.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545