Gizon bat ur bila, Satkhiran. Bangladesh.

Ematen du Parisen adosturiko eginbeharrekoak ez direla ongi bete, eta jada helburu hori ez dela egingarria aitortu du NBEk. Berotzea ezin saihetsi, eta fenomenoa nola geldotu erabakitzekoa dute Turkian egiten ari diren COPean.

Berotzea ez da, ordea, abiadura berean ematen planetako leku guzietan, eta bataz bestekoa 1,5ra ez bada heldu ere, leku ainitzetan langa horretara iritsi direla adierazi du Klima Aldaketaren Gobernuarteko Adituen Taldeak, Nature Climate Change-n. Fenomenoa ikertzeko, lurreko 46 eskualdetako berotzeak behatu dituzte adituek, aro aurre-industrialetik gaur egun arte (1850/1900-2025). Planetako eskualde gehienak langa horretarako aurreikusten den bero mailaren  %90 eta %94 tartera heldu direla zehaztu du taldeak. 

Giza-jardueren ondorio

Berotzeak nola gertatu diren aztertzeko, Afrika, Latinoamerika, Poloak eta beste eskualde ugaritan behaketak egin ditu taldeak. Txinako eta Kanadako adituen laguntzaz, lurzoru hurbileko behaketa historikoak eta modelo klimatikoen simulazioak konbinatu dituzte, berotzeen arrazoiak ulertu nahian. Datuen ondorioak begi bistakoak egin zaizkie adituei: berotze ia guzien arrazoia negutegi efektua areagotzen duen CO2 isurketa da. Fenomenoaren larritasuna ikusirik, txostenak erakusten du beharrezkoa dela neurriak hartzea ondorio humano eta ekonomikoak aurreikusteko.

Txostenaren arabera, gehien berotu diren eskualdeak Kanada eta Artiko errusiarra dira, 2,6 eta 3,3 gradu, hurrenez hurren. Latinoamerika edo Zeelanda Berria gisako ozeanoz inguraturiko lurraldeek, berriz, denbora gehiago behar izaten dute berotzeko, ura ez delako hain azkar berotzen. 

2 graduen langa

Europa osoan gainditu da 1,5 graduko berotzea: Europa Ekialdea (2,4°C), Europa Mendebaldea eta Zentrala (2,2°C), Ipar-Europa (1,8°C) eta Mediterraneoa (1,7°C). Txostenean Peter Stotten hitzak jasotzen dira, Exeter unibertsitateko Met Office Hadley Centre-eko ikertzailea. 2 graduko berotze globala oraindik oztopatu daitekeela sinetsita badago ere, gizarteak "saihetsi ezin dituen ondorio klimatikoak" pairatuko dituela ohartarazi du.

Eskualde Geografia Analisiko katedradun Jorge Olcinak, bere aldetik, 2 graduko berotzea saihetsezina dela uste du, eta beraz proiekzio klimatikoak errealitateari "egokitu" behar direla. Science Media Centre Españari eginiko deklarazioetan, organismo internazional eta europar batzuek 3 edo 4 graduko berotze globala aurreikusten dutela erran du Olcinak, eta horrek galera ekonomiko eta humano handiak eragingo lituzkeela.