Lula da Silva Brasilgo presidentea, eskuinean, gailurreko lehendakari Andre Correari mintzo zaio.

Azken hiru urteetan energia fosilen ekoizpena oso garrantzitsua den herrialdetan egin da –Azerbadjan, Arabiar Emirerri Batuak eta Egipto– eta oraingoan Brasilen egiteak bestelako emaitzak lortzeko esperantza izpi batzuk piztu zituen. Bi aste ibili dira munduko herrialde gehienak negoziatzen, baina ostiral goizean jakin denez, gailurrean onartzeko azken zirriborrotik energia fosilen edozelako aipamen desagertu da.

Asteartean aurkeztutako zirriborroan oraindik baziren aipamen horiek. Hartan zehazten zen CO2a gutxitzeko eta energia fosilak atzean uzteko ibilbide orri bat finkatu behar zela, baina azken testuan aipamen horiek desagertu egin dira. Antza, energia fosilen ekoizpenean diren herrialdeek presio egin dute, eta Brasilek azkenean amore eman du. Climática hedabidean aipatzen denez, ostegunean 40 herrialdek –horien artean Europako garrantzitsuenak– jakinarazi zioten gailurraren lehendakaritzari ez zutela sinatuko testua, baldin eta honek ez bazuen aipamenik egiten energia fosilak atzean utzi beharrari.

Teorian, ostiral honetan bukatzen da bi astez luzatu den gailurra, baina beste hainbat gailurretan gertatu den legez, posible da ere negoziazioak asteburura luzatzea. Zirriborroak zehazten duenez, planetaren berotzea 1,5 gradutan mantenatzeko, negutegi eragineko gasak %43 murriztu beharko lirateke 2030erako eta %60 2035erako, 2019ko mailetatik abiatuta; horrela 2050ean CO2 zero isuri egin beharko litzateke. Dena den, CO2 isuriak murrizten baino handitzen jarraitzen dute urtez urte, eta hori dela eta, helburu horiek beteko diren esperantza Pelloren egiaren antzekoak dira, hau da, hutsalak.

Herrialde aberatsek txiroagoak direnei eman beharreko finantzazioan ere atzerapauso garrantzitsua eman da. Teorian, aberatsenek urtero 100.000 eurorekin finantzatu behar zituzten garapenean diren herrialdeen CO2 murrizketa ahaleginak. Ez da horrelakorik bete, baina orain, gainera, azken zirriborrotik ere kanpo geratu da aipamena.