Biometanizazio proiektuen aurkako mobilizazio bat Iruñean.

“Nafarroako Gobernuko Landa Garapen eta Ingurumen Departamentuak gora jotzeko errekurtso bat onartu du Sesmako udalerrian Biometano Sesma SL enpresak sustatutako biometanizazio-planta bat egiteko baimenaren aurka. Era horretan, Foru Aginduaren bidez, instalazio horri urrian emandako Ingurumeneko Baimen Integratua (IBI) bertan behera geratu da”. Horixe dio ingurumen departamentuak ostegun honetan zabaldutako oharrak dioena.

Ingurumen foru departamentuak argudiatu duenez, instalazioen sustatzaile den Biometano Sesma SLk ez du izango behar beste lursailik eskura aurreikusitako biometanizazio-plantatik sortutako digestatoa barreiatzeko, eta horrek nitrogeno kutsadura sor dezake.

Ingurumen Zuzendaritza Nagusiaren Ekonomia Zirkularrerako eta Berrikuntzarako zerbitzuak aztertu du Sesmako Udalaren helegitea, eta bertatik diotenez, Biometano Sesma SLren eskaera ez dator bat 234/2025 Foru Aginduarekin. Enpresak aurkeztu du digestatoa barreiatzeko lur kopuru zehatza, baina zerbitzuak dioenez, horretarako baimena lur-jabeek eman behar dute eta ez lurren maizterrek, kasu honetan gertatu den gisan. Lur-jabeen baimenik izan ezean, enpresen eskaerak ez du betetzen aurrera jarraitzeko ezinbestekoa den Ingurumen Baimen Integratua.

Arroizen ere ez

Arroitzeko kasuan ere bertako udalak jarri zuen helegitea eta ingurumen departamentuak argudio bera erabili du jadanik emana zuen IBIa orain atzera botatzeko. Proiektuaren sustatzaile AGR Biogás S.A.-k 1.500 hektareako lur saila identifikatu zuen digestatoa barreiatzeko, horien artean Arroitz eta Lukineko udalen lur-sailak, baina udal horiek ez zuten eman horretarako baimenik.

Ingurumen departamentuaren ezezko horiek ez dira behin betikoak, eta enpresek lortuko balituzkete lur-jabeen baimenak proiektuek aurrera egin ahal izango lukete. Edozein kasutan, hori ez da erraza izango, lur horietako batzuk udal lurrak direlako eta bi udalek dagoeneko adierazi dutelako biometanizazio proiektuon aurkako jarrera.

2025a baino geroago biometanizazio-plantak eraikitzeko baimenak eskatu dituzten enpresen proiektuak geldiarazita daude –lau bat plantari eragiten die–, iazko urrian Nafarroako Legebiltzarrak onartutako moratoriaren ondoren. Datorren irailaren 30ean amaituko da moratoriaren epea eta orduan argituko da proiektu horiekin zer gertatuko den. Gerta liteke, halaber, lehenago onartzea Nafarroako Gobernua prestatzen ari den lur zaurgarrietako sahats eta digestatoen kudeaketarako dekretua kaleratzea, eta horrek ere finka dezake proiektuokin zer gertatuko den.

Nafarroan gertatzen ari den biometanizazio prozesuari buruzko erreportaje zabala argitaratu du ARGIAk aste honetan eta bertan ematen dira olatu berri honi buruzko hamaika azalpen.