Angulen trafikoaren kontrako operazioari ekin dio Guardia Zibilak Aginagan

Asteartea 8:00ak aldera hasi du operazioa Guardia Zibilak Aginagako angula enpresa batean. Ikerketa abian da angulen trafiko delitua eta kontrabandoa izan den aztertzeko, Guardia Zibilaren, Europolen eta Jendarmeriaren eskutik. Bizirik zeuden angulak konfiskatu dizkiete euren hazkuntza eta elaborazio prozesuaz arduratzen den enpresari eta Gipuzkoako Foru Aldundiaren esku gelditu dira. Hala ere, ez da erregistro gehiagoren edo atxiloketen berririk eman Naizek jaso duenez.

2023ko maiatzean lehen operazio poliziala egin zen Gipuzkoan eta ikerketak abiatu ziren Bidaxunen (Lapurdi) eta Landetan (Frantziako Estatua). Elkarlanean aritu ziren Guardia Zibila, Jendarmeria, Europol eta OLAF (Iruzurraren aurkako Europako Agentzia) hainbat herri miatzen, horien artean, Oiartzun eta Getaria (Gipuzkoa). 1,5 tona angula konfiskatu zituzten eta 27 pertsona atxilotu. 2025-26 denboraldian, espeziearen egoera larria ikusita, Eusko Jaurlaritzak egun abian jarraitzen duen arrantzarako debekua ezarri zuen.