Hernaniko (Gipuzkoa) Urumeako mendietan 199’5 metroko altuerako bost airesorgailu jarri nahi ditu “Ikatz Gane” izeneko proiektuak. Berau otsailaren 23an jendaurrean jarri zuen Eusko Jaurlaritzak (hemen dago proiektua) eta apirilaren 10 arte dago alegazioak aurkezteko epea. Haize errotak Ereñotzuko Pagoaga auzoko mendietan (Pagalegi-Larregi-Garagartza gailurren mendilerroan) eta Aranoko (Nafarroa) mugan kokatu nahi ditu Enigma Green Power enpresak. Baina proiektuak ez du inongo aipamenik egiten Nafarroa eta Gipuzkoaren arteko mugaren ingurune berdintsuan Repsol enpresak planteatutako "Erreka" izeneko makroproiektu eolikoari buruz.

Sagarreta Natur Taldearen adierazpena

Hernaniko Sagarreta Natur Taldeak "irmoki" salatu du "Enigma Green Power SLU-ren bitartez, Endesa SA-k Hernanin egin nahi duen ankerkeria!". Bere hitzetan, "proiektuak aurrera eginez gero, bertako fauna eta florari eragingo dizkion kalteak nabariak izango dira". Hain justu, proiektuak kaltetuko lituzkeen natur ondare hauek aipatu ditu: "Kontutan izan behar dugu Kartola eta Sagarreta bailarek duten garrantzia. Bi errekak babestuta daude eta horrelako eremuak balorean jarri behar dira. Eremua oso zaurgarria da honelako proiektuak aurrera egingo balu. Izan ere, erreka eta bailara hauek galtzorian eta mehatxupean dauden hainbat animali, landare, hegazti eta xaguxarren bizitoki dira. Hau gutxi ez, eta Aiako Harria Parke Naturalaren eta Leitzarango Biotopo Babestuaren arteko korridore ekologiko gisa izendatua dago suntsitu nahi duten eremua".

Bestalde, ingurunearen balio historikoa ere nabarmendu dute: "Instalatu nahi dituzten tokitik metro gutxira daude San Migel Soro-ko eta Ezioko mairubaratzak, Hernaniko zilegimendiak zirenak edo hainbat sarobe. Hernaniarron ondare historiko diren eta oraindik ongi aztertu gabe dauden hainbat elementu betiko galdu daitezke".

Proiektuak zehazki auzo eta herri hauetako bizilagunak kaltetuko dituela ohartarazi dute: Zikuñaga, Osiñaga, Epele, Ereñotzu, Pagoaga eta Aranoko herritarrak. "Bertatik bertara pairatuko dituzte bizi osorako izango diren kalteak. Desjabetzeak, argindar lineak, kamioien joan-etorriak, lur mugimenduak, kalte paisajistikoak, soinuak, infra-soinuak, itzal keinukariak, biltegiratze arriskutsuak, ur kutsatuak…".

Sinadura bilketa eta hitzaldia

Arrazoi horiek emanik, Sagarreta Natur Taldeak herri alegazioak "babestu eta sinatzera" deitu ditu euskal herritar oro, "bereziki Urumea bailarako herritar guztiak".

Ildo berean, Urumeako Mendiak Bizirik taldeak alegazio bat jarri du herritarren eskura sinatzeko (dokumentu hau deskargatu, bete, sinatu eta umbizirik@gmail.com helbidera bidali daiteke). Horrez gain, dokumentua aurrez aurre sinatzeko aukera hauek eman ditu: ostegunean, martxoaren 12an, Hernaniko azokan egongo dira goizean; eta arratsaldeko 18:30ean Zinkoenean elkarretaratzea egingo dute eta sinatzeko modua ere egongo da. Azkenik, herriro sinadurak biltzeko toki hauek ere jarri dituzte: Goizuetan Amaia kafetegian; Aranon udalean; Ereñotzun udalean eta tabernan; Hernanin Garin, Kide, Sagastiberri tabakoak eta Makoki ileapaindegian eta Herreran (Donostia) Zumardi tabernan.

Bestalde, martxoaren 27an, Energia berriztagarrien sokatira izenburupean hitzaldia antolatu dute LPS honi ez! plataformak, Urumeako Mendiak Bizirik taldeak eta Sagarreta Natur Taldeak elkarrekin. Iñaki Lasagabaster EHUko administrazio zuzenbideko katedraduna eta Aitziber Sarobe Filosofian eta Biologian doktorea arituko dira azalpenak ematen, 18:30ean Hernaniko Biteri kultur etxean, eta bertan aurkeztuko dute LPS honi ez! plataforma.