Tuesteko lau zentral eoliko horiek Burgosko Miranda de Ebroraino eraman behar zuten sortutako energia eta horretarako bi elektrizitate linea eraiki behar ziren. Batak Tueste eta Miranda de Ebro (Burgos) lotuko zituen, Errioxako Erkidegoa eta Araba zeharkatuta; azken herrialde horretako Berantevilla, Armiñon eta Erriberabeitia udalerriei ere eragingo lieke.

Martxoan jakin zen proiektu hori bertan behera geratuko zela, Espainiako Trantsizio Ekologikorako Ministerioak jarritako baldintzen aurrean, Forestaliak aurrera ez zuela jarraituko ezagutu ondoren. Orain ofizial eginda Espainiako Aldizkari Ofizialean, eta horren bidez beste hiru poligono ere bertan bera geratu direla jakin da.

Poligonoen proiektuak modu bateratuan bideratzeko ministerioak jarritako ezintasunen aurrean, Forestaliak banakako proiektuak bideratu nahi izan ditu eta, azkenean, tramite administratiboekin ez jarraitzea erabaki du. Epeak amaitu ondoren, ministerioak proiektuak artxibatu ditu.

Bigarren linea elektrikoak, Amikiri, Kairi eta Kodama poligono eolikoen energia eraman behar zuen Arabara, baina oraingoan Nafarroa zeharkatuta. Bi linea hauek lotuta zeuden poligonoen proiektuekin eta haiek artxibatu ondoren, lineak ere bertan behera geratu dira.

Proiektuok herritarren eta bi lineak zeharkatzen zituzten udalerri askoren oposizioa izan dute, eta Nafarroako eta Errioxako gobernuek ere horiekiko desadostasuna erakutsi dute. Gisa horretakoa da ere Solariak Araba eta Zierbena (Bizkaia) lotzeko eraiki nahi duen linea elektrikoa, baina horren aurka jarritako helegite ugarietako ebazpen zehatzik ez dago oraindik.

Ingurumen erakundeek sarritan salatu dute eraikitzen ari diren proiektu eoliko erraldoi horiek dakarten energia eredu zentralizatua, zeinak horrelako autobide elektriko erraldoien beharra duen, energia sortutako lekuetatik ehunka kilometroetara eramateko.

Horren alternatiba gisa, energia sorrera eta kontsumoa modu deszentralizatuagoan bideratuko lukeen eredua aldarrikatzen dute; horretan, eraiki beharreko sareak askoz txikiagoak beharko lukete, tokiak tokiko beharrei erantzuteko. Azken eredu hau, halaber, askoz erresilienteagoa litzateke iragan apirilean Iberiar Penintsulan izandako itzalaldi erraldoiaren modukoen aurrean.