Beatriz Unzue alkatea eta Xabat Laborde alkateordea maiatzaren 29an azken berriak ematen.

Arrano beltza, sai zuria eta miru gorria dira, besteak beste, Amasamendin Hernani I eta II izeneko makroproiektu eolikoak ezartzeak "nabarmen" kaltetuko lituzkeen hegazti babestuetako batzuk. Hala ondorioztatu du Amasa-Villabona Udalaren eskariz Gipuzkoako Foru Aldundiak egin duen ingurumen txostenak. "Udalak argi du natura ingurunea eta bertako ekosistema zaintzea lehentasunezkoa dela, eta, zentzu horretan, babestutako espezieei kalte nabarmena eragitea gainditu ezin den marra gorria da", adierazi du Xabat Laborde alkateordeak, Beatriz Unzue alkatearekin batera egindako agerraldian. Hori dela-eta, udalak behin behinean eten ditu Premier Group enpresarekin dituen harremanak, "gutxienez proiektua ingurumen ikuspegitik egingarria dela frogatu arte".

Maiatzaren 28an bildu dituzte hedabideak eta herriko eragileak, gaiari buruzko azken berriak emateko. Honela jaso dute Aiurri eta Ataria hedabideek, eta honela irakur daiteke udalaren webgunean.

Enpresak uztailean aurkeztu asmo du behin betiko proiektua Jaurlaritzan

Udalak jakitera eman duenez, enpresak adierazi dio uztailean aurkezteko asmoa duela behin betiko proiektua, ingurumen inpaktuaren azterketarekin batera, Eusko Jaurlaritzan. Hilabeteko epea irekiko litzateke alegazioak egiteko. Jakinik opor garaia izaten dela, hala gertatuko balitz, udalak epea luzatzeko eskaera egingo duela hitzeman dute Unzuek eta Labordek, eta enpresak aurkezten dituen dokumentuak aztertuta, beharrezko ikusten badute, ingurumen eta hirigintza arloko alegazioak aurkeztuko dituztela.

Jaurlaritzak erabakiko du proiektu horri baimena eman ala ez. Jaurlaritzak ingurumen inpaktuaren adierazpen positiboa emango balu, herri galdeketa antolatuko duela esan du udalak. Proiektua herri lurretan dago kokatuta eta herritarrengan delegatu du erabakia, "herritarrek zuzenean erabaki dezaten lur horiek enpresaren esku utzi ala ez". Herri galdeketa aurkakoa balitz, izango lukeen eraginkortasunaz ere mintzatu dira udal ordezkariak: enpresak hasieratik adierazi omen die proiektua udalarekin adostuta egin nahi duela, eta udalaren ustez, "Enpresak erabakia onartu beharko luke; kontrakoa egiteak esan nahiko luke alde bakarrez jokatzea, orain arte adostutakoaren kontra aritzea, eta lurrak espropiatzeko bidea hautatzea".

Udalak enpresarekin orain arte negoziatu duena

Beatriz Unzue alkateak azaldu duenez,  udal gobernuak 2025eko otsailean jaso zuen lehen aldiz Hernani I eta II proiektuari buruzko informazioa, eta urte hartako maiatzean hasi zituen elkarrizketak Premier Group enpresarekin. "Herriaren interesak" defendatzeko baldintza "zorrotzak" ezarri dituztela argudiatu du, eta horregatik aldatu dela proiektuan aerosorgailuen kokapena: lehen baserrietatik 300 metrora zeudenak orain 500 metrora ageri dira, lehen ez bezala herri lurretan.

Alkateak azaldu du enpresari jarritako beste baldintzetako bat dela herri lurre lagapena onartzeko, Amasa-Villabonako herritarren gehiengoaren babesa izatea. Zentral eolikoaren jabetzaren %20 udalarena, publikoa izatea ere jarri diote enpresari baldintza gisa eta herritarrentzat eta herriko jarduerentzat (merkataritza, ostalaritza eta industria) energia hornidura merkeagoa izatea.

Amasa-Villabonako Udala: "Trantsizioa ezin da edozein preziotan egin"

Amasa-Villabonako Udalak energiaren auziaz duen ikuspegia agertu du: "Herriaren borondatea eta ingurumenaren babesa lehentasunezkoak dira, nahiz eta jakin energia iturri berriztagarrien hedapena beharrezkoa izango dela gaur egungo energia kontsumo handiak asetzeko eta erregai fosilekiko mendekotasuna murrizteko".

Onartu dute Amasa-Villabonak urrats sendoak egin behar dituela "energia trantsizioaren" bidean, eta, horretarako, energia fosilekiko mendekotasuna gutxitu eta sektorearen kontrol demokratikoa behar direla.

Energia berriztagarriak funtsezkoak direla esan du alkateak, baina zera gaineratu du: "Hala ere, trantsizio hori ezin da edozein preziotan egin, eta ingurumenaren zein ekosistemen babesa ezinbesteko baldintza da".