Ekainaren 4an agerraldia egin zuten Amasamendi Bizirik taldeko kideek eta irakurketa kritikoa plazaratu zuten, maiatzaren 28an Villabonako Udalak (Gipuzkoa) egin zituen adierazpenekiko: udalak esan zuen Amasamendin makroeolikoa eraiki nahi duen Premier Group enpresarekin harremanak eten dituela. Proiektuaren "azken berriez" informatzeko eta bere jarreraren berri emateko etxeetara Amavi aldizkariaren zenbaki monografiko bat ere bidali du Udalak.

Villabonako Udala "kezkatuta" agertu da, bere eskariz Gipuzkoako Aldundiak egindako ingurumen txostenaren arabera, makroproiektu eolikoak babestutako espezieengan izango duen eraginagatik. Amasamendi Bizirik taldeak berretsi du haiek hasieratik argi zutela dimentsio horretako proiektu batek ingurunean izango lituzkeen ondorioak "onartezinak" direla, eta horren erakusgarritzat aipatu ditu iazko uztailean proiektuaren aurka bildu zituzten 1.548 sinadurak.

Amasamendi Bizirik taldeak Villabonako Udalari zera leporatu dio, adierazpen horietan: "Herritarron presioaren eraginez, ate joka ditugun hauteskundeetara begira udalak bere posizioa zuritzeko izan dezakeen asmoa". Eta honela gaineratu du: "Gaur gaurkoz proiektuarekiko zalantzati agertu dira, baina Eusko Jaurlaritzak proiektua ingurumen aldetik egingarria dela 'frogatzen' badu, berriz ere proiektua bultzatzeko asmoa izatea ez dugu ulertzen".

"Enpresarekin izaniko negoziaketetan udalak ez du inongo abantailarik lortu"

Udalak jakitera eman zuen enpresak proiektua uztailean aurkezteko asmoa duela Jaurlaritzan. Amasamendi Bizirik taldeak faltan bota du udalak elegiteak jartzeko konpromisoa hartu ez izana: "Udalaren hitzetan, proiektuaren eta ingurumen-inpaktuaren azterketa egingo ditu iristen diren egunean eta horrela baloratuko balitz, elegiteak aurkeztu. Dagoeneko proiektuak kalteak eragingo dituela argi dago, eta ez al dira gai gaurdanik elegiteak jartzeko konpromisoa hartzeko?".

Udalak lorpentzat aurkeztu zituen Premier Group enpresarekin negoziatuta hitzartutako abantailak. Ordea, Amasamendi Bizirik taldeak ukatu egin du horiek lortutako abantailak direnik: "Orain arte enpresarekin izaniko negoziaketetan udalak ez du inongo abantailarik lortu. Honako enpresa multinazional hauekin idatziz jasota ere ez dago ezer ziurtatzerik, bada, guk dakigunaren arabera, udalak aipatzen dituen abantailak idatziz jasoak ere ez dituelako. Horrez gain, Premier Group bezalako enpresa batekin baldintzak idatziz jasota ere, gero (askotan gertatu izan den bezala) eraikitzera beste enpresa bat baldin badator, adostutako hori guztia pikutara joan daiteke".

"Trantsizio berdea" auzitan

Amasamendi Bizirik taldeak auzitan jarri du "trantsizio berdea"ren diskurtsoa: "Premier Group bezalako enpresek (eta haren %75aren jabetza duen KGAL-en erako inbertsio funtsek) 'trantsizio berdearen' diskurtsoa erabiltzen dute makroproiektu energetikoak legitimatzeko, baina praktikan mendien industrializazioa, basoen suntsiketa eta biodibertsitatearen galera dakarte". Taldearen iritziz, makro mailako berriztagarrien "hedapen neurrigabearen" helburua ez da kontsumo energetikoaren efizientzia edota murrizketa, "gutxi batzuen irabaziak handitzen jarraitzea baino".

Horren aurrean, Amasamendi Bizirik taldearentzat ezinbestekoa da egungo eredu kapitalista eta bizi dugun krisi ekologikoa zuzenean lotzea. Horren adibidetzat eman dituzte hainbat datu: "Eskura ditugun datuek erakusten dutenez, instalazio eoliko eta fotovoltaikoen inoizko zabalpen handiena eman da azken hamarkadan. Hala ere, World Meteorological Organization-ek ohartarazi du atmosferako CO₂ mailak eta tenperaturak inoizko markak hausten ari direla. Bestalde, Global Carbon Project-en 2024ko txostenaren arabera, munduko CO₂ emisio fosilak berriro igo dira eta 37,4 mila milioi tonako errekorra lortu dute; ikertzaileek diote oraindik ez dagoela emisioen 'gailurra' iritsi den seinalerik".

Datu horietan oinarrituta, ondorio hau atera du Amasamendi Bizirik taldeak: "Datuek erakusten dute krisi ekologikoa ez dela teknologia faltaren ondorioa, etengabeko hazkunde ekonomikoa behar duen sistema baten emaitza zuzena baizik".

Zera nabarmendu dute prentsaren aurrean: "Ez dugu onartuko gure mendiak eta ingurunea interes ekonomiko pribatuen mesedetan suntsitzea, ezta 'trantsizio berdearen' izenean makroproiektu suntsitzaileak inposatzea ere. Horregatik, Amasamendiren defentsan eta makroeolikoen aurka lanean, antolatzen eta borrokatzen jarraituko dugu".