Goizeko 10:15etan Gasteizko Olarizu lorategi botanikoko etxaldean dugu hitzordua ekainaren 13an, zuhaitz eta arbolekiko jakin mina dugunok. Hemen ikus daiteke zehazki bertara nola iritsi, eta garraio publikoz joateko dauden aukerak.

Zuhaitzak eta arbolak Euskal Herrian liburuaren estreinako aurkezpena Ziburuko Euskal Liburu eta Disko Azokan egin berritan, hiru egileek argi zuten non izango zen hamar urteko lan hau ospatzeko ekitaldi berezia: izan ere, Gasteizko Olarizu lorategi botanikoan egin dira libururako argazki gehienak, zehazki, Dani Blanco argazkilariak 116 zuhaitz eta arbola espezieen hosto, lore, hazi eta enbor azalari ateratakoak.

Beraz, lorategi botanikoan barneratuko gara, Jakoba Errekondo, Markel Arriolabengoa eta Iñaki Etxebeste egileei segika, ea zein arbolaren itzalpera garamatzaten eta zer ikasten dugun zuhaitz horri buruz. Entzuleon artean izango dira, ordea, azalpen horietatik tiraka bertsoak kantatuko dituzten Onintza Enbeita eta Unai Agirre bertsolariak.

12:00ak aldera abiapuntura itzuliko gara, Olarizuko etxalde barruko areto nagusian lasai eseri eta liburu aurkezpena entzuteko. Azalpenekin batera, Blancok libururako ateratako hainbat argazki ikusi ahal izango dira, tamaina handian. Egileei galderak egiteko aukera egongo da, baita liburua erosi eta sinatuta eramatekoa ere.

Goiza biribiltzeko eta ospakizuna elkarrekin txin-txin eginaz ixteko, Fede Pachak sasoiko eta bertako produktuz eskainiko duen dastaketa gozatuko dugu.

Zuhaitz eta arbola zalea bazara, zatoz. Ez da sarrerarik ordaindu beharrik, ez aurrez izenik eman beharrik. Lurrari buruzko gaiak estimatzen dituen jendearekin egingo duzu topo bertan, ARGIAko Bizi Baratzea komunitateak poz handiz hartuko zaitu.