Istripua izan duen kamioietako bat.

44 urteko kamioilari bat hil da astearte arratsaldean Murchanten (Nafarroa), bi kamioiren arteko istripuan. Lan istripua AP-68 autobidean gertatu da, 217. kilometroan. Zaragozarako noranzkoan zihoan kamioia, atun kontserbak zeramatzana, bidetik atera da, eta Logroñoranzko norabidean sartu da. Paretik zetorren bertze kamioia aurrez aurre jo du.  Kamioi horrek Tesla markako autoak zeramatzan, eta Bilborako noranzkoan zihoan.

19:23ean jaso dute larrialdi zerbitzuek istripuaren berri. Tuterako eta Azkoiengo suhiltzaileak, lau anbulantzia eta medikuak, eta foruzainak eta guardia zibilak joan dira istripuaren tokira, Nafarroako Gobernuak jakinarazi duenez. Ezin izan dute, ordea, deus egin hildakoaren bizia salbatzeko, eta 44 urteko gizonezkoa tokian bertan hil da. 

Istripuaren ondorioz, bertze kamioiak zeramatzan auto batzuk erori dira, eta 41 urteko kamioilariak zauri arinak ditu. Anbulantzian eraman dute Tuterako ospitalera.

Hildakoaren gorpuari autopsia eginen diote Nafarroako Auzitegi Medikuntzako Institutuan. Foruzaingoak ikerketa abiatu du, istripuaren arrazoiak argitzeko. 

35 hildako 2026an

Astearte honetan Euskal Herrian hildako bigarren langilea da, Donostiako metroa eraikitzeko lanetan zebilen langile bat hil baita astearte goizean. 

LAB sindikatuak egiten duen zenbaketaren arabera, Murchantekoa urtean lanean hiltzen den 35. langilea da. Ipar Euskal Herrian bi dira zendutako langileak, Hego Euskal herrian 31, eta Euskal Herritik kanpo bertze bi.