Frantziako Gobernuak berriz legeztaturiko bi pestizideek minbizia sortzen dutela frogatuta dago zientifikoki.

"Interes orokorraren izenean" egin du debekaturiko bi pestizida berriz legeztatzearen alde Frantziako Konstituzio Kontseiluak, eta "garaipentzat" jo du pausoa Laborantza ministro Annie Genevardek. Laborantzako urgentziazko legeak zeresana sortu du azken asteetan, finean, logika agroindustrialari erantzuten diolako, trantsizio ekologikoari begira jarritako helburuak zalantzan jarrita. Adibidez, urari eta ureztatzeari begira harturiko neurriek kexua eragin dute laborantza herrikoiaren alde dabiltzanen artean. Ur biltegiak errazago egiteko eta 2035erako bildutako bolumenak bikoizteko neurri guztiak onartu ditu Konstituzio Kontseiluak. Orain arte debekaturiko bi pestiziden erabilpena onartu izana bada norabide horretan doan beste urrats bat. 

Azetamiprida eta flupiradifurona pestizidak legeztatzearen kontrako elkarretaratzea eginen dute larunbatean Miarritzeko Amilotxen karrikako 4. zenbakian. Pestizida horien eta minbizien arteko loturak zientifikoki frogatuak diren honetan, Cancer Colère egitura dabil buru belarri lege horren kontrako borrokan. Minbizia duten herritar batzuen lekukotasunak entzungai izanen dira larunbateko hitzorduan. ELBk ere bat egin du deialdiarekin. "Bere galbidera doan agroindustria ereduaren iraunarazteko ahalegin hutsal bat" da bozketa hori sindikatuaren arabera. Bere haserrea plazaratu du ELBk agiri bidez: "Politika horien arduragabekeriak ondorio biziki larriak izanen ditu osasun publikoan eta laborantzan!". Norabide aldaketa galdetzen die instituzio politikoei, laborantza bizirik eta "laborariek tokian tokiko elikadura osasungarria sortzen" segitzeko gisan.