Lokatzez beteta eta ezinegonak hartuta esnatu dira Nepalen eta Tibeten. Asteazken goizaldean (Euskal Herrian arratsaldea zenean) bat-batean lur jausi batek mugako eskualdeko herriak, zubiak eta errepideak suntsitu ditu. India eta Txinaren artean gertatu da ezbeharra, Himalaia mendikatearen magalean. Tibeteko Gyirong konderria eta Nepalgo Bagmati eskualdea dira kaltetuenak, batez ere bigarren hori.

Nepalgo Poliziaren arabera, guztira 289 hildako daude, baina gehiago izango direla aurreikusi dute. "[Hildakoen] Kopurua handituko da, bilaketak berrabiarazi ditugulako eta gorpu gehiago topatzea espero dugulako", adierazi du Nepalgo Polizia buru Abi Narayan Kaflek. Bere aldetik, Txinak sei heriotzaren berri eman du; Tibet Txinako Eskualde Autonomoa da. 

Desagertuei dagokionez, kopurua etengabe ari da areagotzen. Orain arte 1.400 zenbatu dituzte orotara: 826 Nepalen eta 558 mugaren beste aldean. Lokalizatu gabe daudenen artean asko turistak dira, mendizale askoren opor lekua baita zonaldea, baina baita Nepalen eta Txinaren arteko muga delako ere. 726 dira atzerritar desagertuak, horietatik 466 Nepalen.

Hala eta guztiz ere, behin-behinekoa da zerrenda, inkomunikatuta eremu asko daudelako moztutako errepideengatik. Erreskate taldeek zailtasunak dituzte eremu kaltetuetara iristeko, errepideak eta bideak suntsituta baitaude lokatzak arrastaka ekarritako hondakinegatik.

Nepalgo erreskate talde eta armadaren arabera, 123 pertsona erreskatatzea lortu dute, horietatik 29 atzerritarrak. Txinako agintariek, beraien aldetik, jakinarazi dute 360 pertsona baino gehiago ebakuatu behar izan dituztela. Nazioarteko lehen laguntzak ere iristen hasi ziren hondamendiaren epizentrora. Indiak materiala eta janaria bidali ditu, eta AEBek, berriz, 400.000 euro bidali ditu. 

Kausak

Hasiera batean uste izan da lurrikara batek eragin duela luizia, AEBetako USGS zerbitzu geologikoek asteazken goizalean 4,4 graduko seismo bat sumatu zutelako Tibeten, mugatik gertu. Azkenean, baina, iturri ofizialen arabera, glaziarraren kolapsoa izan da kausa. Kolapsoak 5,2 graduko desplazamendua eragin du, izotz bloke handi bat erorarazita eta luizia eraginda. Izotz blokea, 5.200 metroko altueratik 1.200 metro erortzean, Tibeteko Lhende ibaia kolpatu eta urez eta lokatzez beteriko luizia eragin du.