"Zailtasunez" bada ere, adostasunarena heldu dira Europar Batasuneko 27 Ingurumen ministroak: 1990koei alderatuta, 2040rako CO2 isuriak %90 murrizteko bide-orria berretsi dute. Baina lortu ahal izateko, malgutasunez jokatu behar izan dute, izan ere geroz eta ordezkaritza handiagoa duen eskuin muturrak horrelakorik ez zuelako nahi. Hori horrela, karbonoa isurtzeko eskubideak erosiz, betetzen ahalko dute helburua, "nazioarteko karbono-kredituen %10 erosteko aukera" izanen dutelako –hastapen batean %5 eta ondoko klima legean %5 gehitzeko bermea ere jasotzen ahalko dute–. Klima neutraltasuna 2050erako lortzea da asmoa, beti ere 2015eko Pariseko COP21 gailurrarekin bat eginez.

Erabaki hori Nazio Batuen Ingurumen Programaren Emission Gap Report 2025 txostenaren biharamunean dator. Industriaurreko aroarekin alderatuta, mundua 2,3 eta 2,5 gradu arteko berotze batera doala ohartarazten du dokumentu horrek. Horregatik zaie Europar Batasunak adostu klima plana "eskasegia" ingurumenaren alde dabiltzan GKEei. "Zientzialariek klima-inflexio-puntuei, bero-bolada hilgarriei edo nekazaritza-galerei buruz egiten dituzten ohartarazpenak ugaritzen diren bitartean, seriotasun falta hori guztiz arduragabea da, eta kostu sozial eta ekonomiko tamalgarriak eraginen ditu", Greenpeacen arabera.

Asteartean bukatzekoak zituzten negoziaketak, baina horrelakorik ez zuten lortu. Iritzi eta postura ezberdinak izateaz gain, akordioak jaso beharreko babesaren heinak ere zaildu die adostasunerako bidea: gehiengo kualifikatua behar zuen, hots, estatu kideen %55en gutxieneko babesa –27etatik 15ena–, eta estatu horiek EBko biztanleen %65 izatea gutxienez. Polonia, Italia eta Frantziako Estatua izan dira klima helburuen aurkari sutsuenak eta horien baiezkoa lortzeko gisan malgutu behar izan dute bide-orria.

Ingurumenaren alde dabiltzan GKEek nahiko argi dute Pariseko 2015eko COP21goi bileran adosturiko helburua ez dela beteko –industria aurreko datuei alderatuta, 2100 urterako tenperatura igoerak ahalaz 1,5 graduren langa ez gainditzea, eta okerrean 2 gradurena–.

Karbonoaren merkatua errepide bidezko garraiora eta eraikinen berokuntzara zabaltzeko aukera urtebetez, 2027tik 2028ra, atzeratzea ere onartu dute. Hungariaren edo Poloniaren aldarrikapena zen hori eta kolpe gogorra da klimaren aldeko konpromiso handiena duten herrialdeentzat.

Bi urtero berrikusteko aukera

Klimari buruzko lege hori bi urtean behin berrikusteko klausula ere onartu dute EBko kideek. Hori horrela, jarritako helburuak doitu ahalko dituzte, baldin eta finkatutakoa zailegia bazaie. Nola ez, horrek ere eragin du ekologisten kexua.

2024a izan zen inoizko urterik beroena, eta 1,5 graduko igoeraren langa gainditu zen lehen aldiz, industria aitzineko batez besteko tenperatura aintzat hartuta.