Frantziako Konstituzio Kontseiluak iaz deuseztaturiko Duplomb Legeko bigarren artikuluak zekarrena Nekazaritzarako Larrialdi Legean sartzearen alde egin du senatarien eta diputatuen arteko Batzar Misto Paritarioak: azetamiprida eta flupiradifurona pestizidak legalizatzeko bidea adostu dute. Duplomb legearen ezeztatzea galdetzen zuen eskaerak bi milioi izenpedura bildu zituen iazko urtean eta finean, abuztuaren 7an pestiziden erabilpena baimentzen zuen bigarren artikulua deuseztatu zuen Konstituzio Kontseiluak. Hain justu, ingurumenaren babesaren izenean hartu zuen erabakia –pestizida horiek aurretik ere debekatuta ziren Frantziako Estatuan, dakarzkien kalte ekologikoengatik–. Oroitarazteko, Europar Batasunean baimenduak baldin badira ere, Frantziako Estatuan debekatuta dira bata zein bestea.

Ostegun honetan adosturikoari segi, azetamipridaren erabilera hur-hazkuntzetarako bideratuko litzateke, eta flupiradifurona sagarretarako, gerezietarako eta erremolatxen hazien estaltzeko. Horrez gain, produktu fitosanitario bat merkaturatzeko baimena kenduz gero, "indultu-epea" sistematikoki baimendutako gehieneko iraupenera ezartzearen alde ere egin du batzordeak. Horrek erran nahi du debekatutako pestizidak saltzen segitzen ahalko dutela sei hilabetez, eta urtebetez erabiltzen ahalko dituztela.

"Beste garai bateko legea da, munduaren eraldaketei entzungor egiten diena. Pestizida arriskutsuak berriz baimendu nahi dituzue, Medikuen Elkargoaren jarrerari muzin eginez", adierazi du ezkerreko diputatu Aurélie Trouvék. Greenpeacek ere gogorki salatu du bozketa: "Komunitate zientifikoak behin eta berriz ohartarazi arren, eta neonikotinoideen itzuleraren aurka dauden bi milioi pertsonei bizkarra erakutsita, legebiltzarkideek nahita aukeratu dute arduragabeak diren agroindustrial batzuk lehenestea, ingurumenaren, biodibertsitatearen, osasunaren eta etorkizuneko belaunaldiengan izango duen eraginaren kaltetan. Lotsagarria da!".

Batzorde Misto Paritarioan bildutako zazpi senatarik eta zazpi diputatuk lortu dute Nekazaritza Larrialdiko Lege Proiektuari buruzko adostasuna. Zortzik alde egin dute –hautetsi zentristak, eskuinekoak eta eskuin muturrekoak–, lauk kontra –ezkerreko parlamentariak– eta bi abstenitu dira –Macronen aldekoak biak–. Lege bozketarako prozesu azeleratua erabaki du gobernuak, hori horrela Senatuan zein Legebiltzarrean bozketa bakarra eginen dute.