AHTren aldeko plataforma Nafarroako Enpresarien Konfederazioak sortu zuen duela bost hilabete eta dagoeneko 40 bat eragilek osatzen dute, gehienak enpresa eta ekonomia munduari lotuak.

Plataformako arduradunak pozik agertu dira Osasuna futbol taldearen bat egitearekin, haientzat balore handikoa da eta Nafarroako gizartearen ahots funtsezkoa dakar: “AHT ez da bakarrik azpiegitura teknikoa, ezpada Nafarroaren modernizazioaren eta aurrerapenaren aldeko apustu kolektiboa”, eta haien ustez, Osasuna plataforman egoteak mezu hori indartzen du.

Bere webgunean azaltzen denez, plataforma pozik agertu da Nafarroak Gobernuarekin elkarlanean aritzea lortu dutelako: oraintsu biek batera bilera eskatu diote Oscar Puente Espainiako Gobernuko ministroari, azpiegituraren eraikuntza azkartzeko inbertsio handiagoak egin ditzan.

Azaltzen denez, dena den, beti ez da horrela izan. Presio taldea martxoaren 20an sortu zen eta PSNk kritika egin zion bere kongresuan, plataformak gobernuaren aurka egiten zuelako: “Zergatik ez zen sortu UPN gobernuan zegoenean? Agian eraginkorragoa zatekeen duela hamabost urte sortu balitz, Nafarroako AHTn zero euro inbertitzen zenean?”.