Bi lurrikara gogorrek Venezuela astindu dute.

Hondamendia Venezuelan. Bi lurrikara gogor izan dira asteazken gauean, 7,2 eta 7,5 gradukoak Richter eskalan. Delcy Rodríguez presidenteak jakinarazi du gutxienez 32 pertsona hil direla eta 700 zauritu daudela. Azken datuak dira, baina askoz gehiago izango direla aurreikusi dute. 

ElDiario.es komunikabidearen arabera, azken mendean Venezuela astindu duten lurrikara gogorrenetarikoak izan dira. Lurrikarak herrialdeko arratsalderako seiak pasatxo gertatu dira, Euskal Herrian gauerdia zenean. AEBetako Zerbitzu Geologikoaren (USGS) arabera, lehen lurrikara 7,2 gradukoa izan da, eta bigarrena, lehenengotik 39 segundora, 7,5 gradukoa.

Biktimen datuen artean La Guaira estatukoak falta dira, eremurik kaltetuena, herrialdearen iparraldean eta Carasetik 30 kilometrora dagoena. "La Guaira estatua hondamendi eremua da", ziurtatu du Rodríguezek. Ehunka eraikin amildu direla gehitu du. Oraindik ez dago eremu horretako biktimen datu ofizialik. AEBetako Zerbitzu Geologikoak adierazi du %42ko aukera dagoela hildakoak 10.000 eta 100.000 artean izateko. 

Euskaldun jatorriko pertsona bat hildakoen artean

Momentuz baieztatu diren 32 hildako pertsonen arteko bat euskaldu jatorrikoa da: Alazne Solabarrieta, 65 urtekoa eta Bigarren Errepublika garaian Venezuelara ihes egin zuen Ondarroako alkatearen biloba.

Solabarrietaren bikotekidea euskalduna da, Koldo Olalde. Bikoteak bi alaba ditu, Alazne eta Ilargi izenekoak. Olalde zaurituta dago, baina bizirik. Hondakinen artetik atera dute Olalde, Caracasen, bertan hil da Solabarrieta.

Larrialdi egoera

"Une honetan larrialdi egoera ezartzen ari gara", jakinarazi du Rodríguez presidenteak Venezuelako telebista publikotik. Azaldu du herrialdeko osasun publiko eta pribatu guztia aktibatu dutela, batez ere eremu kaltetuenetan, zaurituak artatzeko. Dionisio Cabello Barne ministroak esan du laguntza eta erreskate lanetan ari direla, eta herritarrei eskatu die kalean egoteko, badaezpada. Erreskate lanetan laguntzeko prest agertu dira Amerikako herrialdeak, tartean AEBak.