Espainiako Estatuko erkidego gehienen babesa jaso du otsoaren populazioa "kontserbazioa egoera onean" dagoela dioen txostenak, eta horrek otsoaren ehizari bide emanen dio. Nafarroak txostenaren alde bozkatu du, eta Araba, Bizkaia eta Gipuzkoa abstenitu egin dira.
Otso bat mendian.
Ingurumeneko Konferentzia Sektorialak astelehen honetan onartu du 2019-2024 epeari dagokion otso iberikoari buruzko seiurteko txostena. Espainiako Gobernuko Trantsizio Ekologikorako eta Erronka Demografikorako Ministerioak eta Kataluniak testuaren kontra bozkatu dute; Gaztela-Mantxa eta Araba, Bizkaia eta Gipuzkoa abstenitu egin dira; gainontzeko erkidego guztiek, Nafarroa barne, alde bozkatu dute.
Dokumentuak ondorioztatzen duenez, otsoaren populazioa “kontserbazio egoera onean” dago Espainian, eta horrek bermatuko du espeziea “kontrolatzea”, eta otsoa berriz ehizatzen hastea.
Otsoa, kontserbazio egoera onean ala txarrean?
Sara Aagesenek zuzentzen duen Trantsizio Ekologikorako eta Erronka Demografikorako Ministerioak, bere aldetik, otsoa "egoera txarrean" dagoela defendatu du txosten alternatibo batean. Erkidegoen txostena "aldebakarreko balorazioa" dela argudiatu du, eta ez datorrela bat Europako Batzordearen irizpide metodologikoekin. Alabaina, ministerioa behartuta dago txosten ofiziala Europako Batzordera bidaltzera, behin betiko onar dezan.
Bertzalde, WWF eta Ecologistas en Acción erakundeek deitoratu egin dute "bozketan irizpide alderdikoiek zientzialarien gainetik jarri izana".
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
