Herritarrak bainua hartzen, Eiffel dorrearen alboko iturrietan.

Pasa den ekainaren 18az geroztik gutxienez 40 lagun hil dira itota Frantziako Estatuan, herrialdeko hondartza, igerileku, erreka eta lakuetan. Gazteak ziren haietako asko, Sébastien Lecornu lehen ministroak jakinarazi duenez, beroaldiaren bueltan eratutako lantalde bereziaren bilera amaituta. Babes zibileko arduradunek hainbatetan errepikatu dute bainua hartzean adi ibiltzeko, eta ez sartzeko debekaturik dagoen lekuetan, urak indar handia izan dezakeelako edota ur azpian arrokak eta igerilariak harrapa ditzaketen landareak egon daitezkeelako. Pasa den udan 409 pertsona ito ziren Frantzian, eta Gobernua beldur da aurten ez ote diren gehiago izango. Halaber, egunotan korrika egitera ateratzen diren herritarrei ere zentzuz jokatzera dei egin diete, hainbatek konortea galdu duela-eta. 

2003az geroztik frantziarrek bizi izandako beroaldirik larriena da, bai intentsitateagatik, bai iraupenagatik. Orduko hartan 15.000 bat lagun hil ziren beroaren eraginez. Aste honetan 29,5 gradutik gorako batez-besteko tenperaturak neurtu dituzte Frantzian, arratsaldeko 15:00ak iristerako, 2003ko zifretatik gorakoak. Gauez ere gainditu dira orain arteko batez-bestekoak, egun batzuetan 21,6 gradukoak izateraino. "Tenperaturari dagokionez marka guztiak gainditzen ari dira, gau eta egun", adierazi du Lecornuk. 39 gradu, 40, 42... sutan dira termometroak.

Egiturazko arazoa

Aurreikusitako bidaiak bertan behera uzteko eskatu die Lecornuk ministroei, eta arreta osoa larrialdi egoerari eskaintzeko. Helburua da egoera honi erantzuteko osasun-sistema osoa mobilizatzea. Besteren artean, Orsan Planaren bigarren maila aktibatzea erabaki du Gobernuak, larriak ez diren kirurgiak atzeratu eta bestelako zerbitzuak, larraildietakoak, esaterako, libreago uzteko. Zentzu horretan, lehen ministroak jakinarazi du ospitaleetako larrialdi-zerbitzuak ez daudela gain hartuta, tentsio geroz eta handiagoa bizi duten arren.

Bestalde, eguneko tarterik beroenetan Eiffel dorrea edota Louvre museoa ixtea erabaki dute, 1.800 bat ikastetxe ere itxita daude eta beste 8.000 inguruk ordutegiak egokitu dituzte... Louvreko zuzendaritzak agiria plazaratu du: "Eraikin historiko honek, bere arkitekturaren zati batzuetan nahikoa erresistentea izanik ere, ahula izaten jarraitzen du, eta ez dago klima aldaketari nahikoa egokituta", dio bertan.

Bero saparen gordinenak asteburura arte iraungo duela uste dute arduradun politikoek. Berriro ere, beroaldi bat dagoen bakoitzean gertatzen den moduan, agerian geratu da Frantzia ez dagoela horri erantzuteko behar bezala prestatuta, besteak beste, eraikinak zaharrak direlako eta horiek egokitzea konplikatu delako.