Imarkoaineko sutea .

Datozen egunetan suteak pizteko arriskua "oso altua" dela ohartarazi du Nafarroako Gobernuak, eta ostiralean arriskua "muturrekoa" izatera iritsiko dela aurreikusi du. Azaldu duenez, datozen egunetan tenperaturak igo egingo dira, batez ere Nafarroako erdialdean eta hegoaldean; zenbait tokitan 40 gradura iritsiko direla iragarri dute, besteak beste, Ebro bailaran. Are gehiago, landarediaren lehortearengatik eta hezetasun faltarengatik, gauetan tenperaturak apenas jaitsiko dira. Hortaz, alerta aktibatu du Gobernuak. 

Larrialdien, Prebentzio eta Babes Zibilaren Zerbitzua lanean ari da beharrezkoak diren neurriak har daitezen eta Barne Zerbitzuek egoera monitorizatzen jarraitzen dute. Bitartean, Nafarroako Gobernuak hainbat aholku eman ditu. Gomendatu du nekazaritzarekin lotutako lanak egiterakoan neurriak hartzea, eta, ahal bada, 14:00etatik aurrera egitea saihestea. Hirietan suarekin harremana duten ekintzak ekiditea aholkatu du, hala nola suak piztu, barbakoak egin edota piroteknia erabili. 

Azken egunetako bi suteak kontrolpean 

Igandean Imarkoainen (Nafarroa) piztutako sutea kontrolpean dago. Igande arratsaldean piztu zen, 16:49an iritsi zen abisua, sua pinudi batean hasi eta zereal soroetara zabaldu zenean. AP-15 errepideko pare bat kilometro itxi behar izan zituzten, baita tren zerbitzua ere; Biurrungo eta Noaingo geltokien artea eta Zaragozatik eta Salamancara bidea eten zituzten. 

Lizarrako, Azkoiengo eta Tafallako suhiltzaileak aritu ziren itzaltze lanetan, bi helikopteroren eta bi hegazkinen laguntzarekin. Gaueko bederatziak aldera egonkortzea lortu zuten. Guztira 80 hektareatik gora kiskali dira, gehienak laborantza-lurrak; eta gainerakoak basoak.

Astelehen eguerdian Antzuola eta Urretxu (Gipuzkoa) artean piztutako sutea ere egonkortuta dago. 13:30ak aldera piztu da, eta hasieran urduritasuna nagusitu bada ere ondoan zeuden baserriengatik, 18:15erako kontrolpean dago sutea. Pinudiak eta sastrakak erre dira nagusiki.