Energiaren Nazioarteko Agentziak urtero ateratzen duen txostenean ezagutarazi du 2024an energia kontsumoa %2,2 hazi dela. Azken hamarkadako bataz besteko hazkundea %1,3koa da. Elektrizitatearen kontsumoa berriz, %4,3 hazi da eta aurreko hamarkadako bataz bestekoa bikoiztu du. Eraikinetako elektrizitatearen erabilera elektrizitatearen hazkundearen ia %60 izan da, eta datu-zentroen energia gaitasuna % 20 handitu da mundu osoan, bereziki AEBn eta Txinan.

IEAk zenbait fenomenori egozten dio energia kontsumoaren hazkundea: munduko tenperatura errekorrei –herrialde askotan "hozte eskaria" bultzatuz–, industriaren kontsumoei, garraioaren elektrifikazioei, datu-zentroen hazkundeari eta adimen artifizialari. Indiak izan du hazkunde handiena (%4,9), ondoren Txina (%2,9) eta hirugarrenik AEB (%1,7(.  Europar Batasunak ere hazkundea izan du, 2017az geroztik lehen aldiz –2021eko Covid-19aren osteko "errebotea" alde batera utzita–.

Energia berriztagarriek gora egin dute

Elektrizitate sorkuntzaren %80a berriztagarrietatik eta energia nuklearretik egin da 2024an. Berriztagarriek 22. urtez jarraian errekorra ezarri dute. Energia nuklearraren ekoizpena, azken hiru hamarkadetako handienetan bosgarrena izan da.

Energia fosilen erabilpena hazi da

Ohi baino gehiago erabili dira 2024an erregai fosilak. Energia eskari berriaren %28 gas naturaletik eratorritakoa izan da, %15 ikatzetik eta %11 petroliotik. Energia berriztagarri eta nuklearrak gainontzeko zatia bete zuten, %38 eta %8 urrenez urren. Erregai fosilen artean, gasak izan du hazkunde handiena: %2,7koa. Ikatza aldiz, %1 hazi da. Hala ere, biek, hazi adina CO2 isuri eragin dituzte, %2,5 gasak eta %0,9 ikatzak.

Petrolioari dagokionez, eskariak gora egin du (%0,8(; 2023. urtean baino hazkunde lausoagoa (%1,9). 2024an petrolioaren kuota %30etik jaitsi da lehen aldiz, % 46ko maximoa lortu eta 50 urtera. Auto elektrikoek izan duten %25eko salmenten hazkundeari egozten dio IEAk jaitsiera.