"Muturreko beroa mehatxu larria eta geroz eta handiagoa da osasun publikoarentzat",  dio Munduko Osasun Erakundeak plazaratutako txostenak. Klima aldaketa, hirigintza, edo biztanleriaren zahartzea aipatzen ditu mehatxua handitu duten faktoreen artean. "Hilkortasuna areagotzen du, osasun sistemak eta gizarte arretako zerbitzuak gainkargatzen ditu, eta zaurgarrienak bereziki kolpatzen ditu". Osasun sistema publikoak erantzun eraginkorra emateko, HHAP –ingelesezko sigletan– ekintza planak garatzeak duen garrantziaz ohartarazi du NBEren baitako agentziak, herrialdeek aukera izango dutelako arazoei aurre hartzeko, herritar zaurgarrienak babesteko, osasun-sistemen "erresilientzia indartzeko" eta saihestu daitezkeen gaixotasunak eta heriotzak murrizteko.

Aire egokitua ez da jasangarria

Munduko Osasun Erakundeak plazaratu berri duen ekintza plan eraginkorrerako gidak aire egokituari erreferentzia egiten dio, haren gaineko politiketan "ñabardurak" egin beharra azpimarratuta. Adierazi du ez dela konponbide "jasangarria", eta herritar guztiek izan beharko luketela hura eskuratzeko aukera, zaurgarrienak bereziki. Izan ere, aparailua instalatu eta mantentzeak argindarraren fakturan eragin potoloa izan dezake.

Beroari aurre egiteko eraikinak klimatizatzea funtsezkoa dela dio erakunde horrek, baina modu jasangarrian egin behar dela, ez ditzan eragin gas emisio gehiago, ezberdintasunak eta kolapso elektrikoak. Gertatu baita lehenago ere Europako herrialde batzuetan, kontsumorik handiena izan den momentuetan oinarrizko beste zerbitzu batzuk arriskuan jarri direla.

Gisako gidalerro edo gomendioen aurrean, eskuin muturrak aire egokitua bai ala bai instalatu beharra defendatu du, "absurdua delako jendea beroz hiltzen uztea", Marine Le Penek egunotan adierazi duen moduan. "Errepikatuko diren beroaldiei aurre egiteko, aire egokitua da irtenbide bakarra zahar etxe, ospitale eta eskoletarako".