"Lurra defenda dezagun! Makroproiekturik ez!" izenburupean egin dute manifestazioa. Bertan lehen sektoreak presentzia nabarmena izan du, hamarnaka traktoreren ordezkaritzarekin.

Manifestazioa iragartzerakoan 160 eragileren babesa egin zuen publiko Araba Bizirikek, baina manifestazioa amaitutakoan jakitera eman dutenez, geroztik atxikimendu kopuruak gora egiten jarraitu du, eta 200 babes inguru lortu dituzte, Arabako administrazio batzar eta udal ugarirena, baita Euskal Herri osoko kolektibo sozialena ere.

Araba Bizirik plataformak manifestazioari buruzko irakurketa hau plazaratu du mobilizazioaren ostean, aurreko urteetako mobilizazioak ere gogora ekarriz: "Arabako gizarteak bere lurra, ingurune naturala eta landa-etorkizuna errespetatu, zaindu eta defendatzen ditu. Berriro egin dugu!".

Salatu dute erakundeek ez dituztela entzun, eta Araban era guztietako industria-proiektu handiak pilatzen jarraitzen dutela. Besteak beste, Abiadura Handiko Trena, makro-zentral eolikoak eta fotovoltaikoak, goi-tentsioko eta oso goi-tentsioko lineak, datuen makro-zentroak, biometanizazio-planta makroak, eta handitze lanak industrialde, aireportu eta harrobietan. Araba Biziriken esanetan, "gure landa-inguruneak eta ingurune naturalak suntsitzen dituzten eskala handiko proiektuak dira guztiak". Eta ohartarazi du ez direla guztion mesederako: "Ez gaitzatela engaina, proiektu horiek ez dira eraikitzen gizartearen beharrak asetzeko helburuarekin. Korporazio handien poltsikoak eta funts putreak betetzea besterik ez dute nahi!".

Energia Berriztagarrien Lurralde Plan Sektoriala gaitzetsi du Araba Bizirikek

Araba Bizirikek esan du Eusko Jaurlaritza lantzen ari den Energia Berriztagarrien Lurralde Plan Sektorialak ez duela balio lurraldea babesteko: "Alfonbra gorria da energia multinazionalentzat". Eta horrez gain, oroitarazi du Energiaren Euskal Erakundeak azelerazio plan bat abiarazia duela, "sakrifizio gune horiek enpresa handiei eskaintzeko, diru publikoa 80 milioi euro xahutuz".

"Espoliazio" gisa izendatu du Araba Bizirikek egoera, eta horrek ondorio hauek dituela esan du: "Paisaia zauritzen du, ondasun naturalak pribatizatzen ditu, lurrak eta herri-mendiak desjabetzen ditu, landa-inguruneko bizi-proiektuak hausten ditu, eta gure komunitateak abandonura bultzatzen ditu". Gaitzetsi dute erakundeek bultzatzen duten ikuspegi horrek ez duela kontuan hartzen bertako mendi eta haranen balio ekologikoa, nekazaritzakoa eta soziala: "Lurraldea merkatuaren interesen menpe jartzea besterik ez dute bilatzen!".

"Borroka fruituak ematen ari da"

Araba Bizirikek nabarmendu du gaur egun Araba dela "gehien kaltetutako" eremuetako bat. Baina egoera hori Euskal Herriko lurralde guztietan errepikatzen dela esan du: "Sustatzaile berberak, erakundeen utzikeria bera eta informazioa ezkutatzea". Horregatik, zera gehitu du: "Lurralde horietan egiten den borroka ere gure borroka da! Eta gure borroka eurena da! Euskal Herria ez dago salgai!".

Araba Bizirikek adierazi duenez, "borroka fruituak ematen ari da": "Gero eta gehiago gara botere politikoak babestutako korporazio handien jardunbideak zalantzan jartzen ditugunak. Gizartearen erantzunak eta aurkeztutako alegazioek geldiarazten dute igoera hori. Borroka fruituak ematen ari da, makro-proiektuak geldiarazten ari gara!". Zentzu horretan, deia luzatu diete herritarrei: "Hau ez da hemen amaitzen! Orain ez da gelditzeko unea! Antolatzen, aurre egiten eta borrokatzen jarraituko dugu, Lurraren defentsan!".