Endesaren proiektuak Arano eta Hernani arteko mendiei eragingo die. Gainera, Repsolek beste makro-eolikoen zentral bat egin nahi du ondoan.

Urumeako mendietan ia 200 metroko altuerako dorre eolikoak jartzeko asmoak faunan eta floran kalte larriak eragin ditzake. Hala eman dute aditzera Nafarroako Gobernuak egindako bi txostenek. Horien arabera, Enigma Green Power enpresak aurreikusitako "Ikatz Gane" proiektua gauzatuko balitz, Mendebaldeko Pirinioetako migrazio-bideari zuzenean eragingo lioke eta zaurgarritasun egoeran dauden animalia espezie ugari kaltetuko lituzke.

Endesa multinazionalak, enpresa horren bidez, Hernaniko udalerriko lurretan bost aerosorgailu erraldoi paratu nahi ditu, Aranoko lurrekin muga egiten duen mendilerroan, Aiako Harria parne naturalaren eta Leitzarango bailararen arteko korridore ekologikoan. 

Aranoko Udalaren eskari bati erantzunda, Nafarroako Gobernuak bi txosten egin ditu proiektuak izango lituzkeen ingurumen eraginen inguruan. Foru administrazioak, pagausoaren (Columba palumbus) eta txolomaren (Columba oenas) adibideak hartuta, azaldu du migrazio-bideak mendebalderantz ari direla egiten, hain justu eolikoak jarri nahi dituzten eremurantz, eta hortaz, proiektuak "ondorio kaltegarriak" izango lituzkeela horietan. Gainera, txostenetako batean egoera zaurgarrian dauden 198 animalia-espezie zerrendatu ditu, horietatik 144 Babes Bereziko Espezieen Zerrendan daude sailkatuta. 

Proiektuaren ingurumen azterketaren gabeziak agerian

Aranoko Udalak Eusko Jaurlaritzaren aurrean proiektuari jarritako alegazioan bi txostenak barne hartzen ditu, eta Aitziber Sarobe natur-kontserbazionistak horien inguruan egindako irakurketa ere badakar. Bere esanetan, aerosorgailuek bereziki kaltetuko lituzkete honako hegazti-espezieak: Sai arrea, arrano beltza, aztore-arranoa, miru beltza, belatz gorria, eta belatz handia; baita sagu zahar espezie ugari, basakatua eta hainbat narrasti espezie, eta inguruko flora ere.

Saroberen iritziz, txostenek agerian utzi dituzte Ingurumen Inpaktuaren Azterketak dituen gabeziak, baita proiektua ingurumenaren babesarekin "guztiz bateraezina" dela ere.

"Ikatz Gane" proiektuari alegazioak jartzeko epea joan den martxoan zabaldu zen. Urumeako Mendiak Bizirik plataformak 3.512 alegazio jarri dizkio, eta Hernaniko Udalak 42. Bestetik, Aranoko herritarren %96 proiektuaren kontra azaldu da sinadura bilketa batean, eta asteazken honetan Aranoko Udalak ere alegazioa jarri dio.