Duela 30 bat urte ikasi zuen Aitor Bastarrika gipuzkoarrak landareekin eta bestelako naturako elementuekin tindaketak egiten, Guatemalan bizi zenean: “Han ikasi nuen landareekin tindatzen, eta gero Euskal Herrira itzuli eta hemengo landareekin probak egiten hasi nintzen”, azaldu du hastapena. Galtzerdiak, bufandak, eskularruak eta bestelako arropak tindatzen ditu, eta zuzeneko salmenta bidez merkaturatzen ditu gero. ‘Ecoprint’ edo estanpazio botanikoa ere egiten du: loreekin eta hostoekin galtzerdi, fular nahiz kamisetetan inprimazioak egitean datza.
2016tik ARGIAn astero esperientzia baten berri ematen du.
Urte hauetan guztietan proba-errore bidez ikasi duela dio Bastarrikak, izan ere, Guatemalan zerabiltzaten landare asko ez ditugu gurean. “Ez dut maisurik izan honetan, nire kasa ikasten joan naiz, probak egiten, irakurtzen…”, dio. Eta, proba horietan deskubritu du pixkanaka gure inguru hurbilean ditugun zein landarek eta naturako zein elementuk balio dezaketen tindaketak egiteko: asunarekin eta binorriarekin lortzen du kolore berdea, intxaurraren kanpoko azalarekin marroia, zumakearekin grisa, rumexarekin eta granada azalarekin horia… “Horiek lortzen ditut bertako landareekin, horiek dira, nolabait, gure koloreak”, dio.
Gorriak, larrosak, urdinak eta beste pigmentu batzuk lortzeko, berriz, kanpoko landareetara jotzen du Bastarrikak. Esaterako, laranja otxar tindagaiarekin (rubia tinctorum) lortzen du; gorri eta arrosa koloreak, berriz, Kanarietan bizi den kotxinilarekin; eta urdina, indigoarekin. “Landareekin eta elementu naturalekin tindatzeko ezinbestekoa da ehun naturalak erabiltzea, sintetikoek ez baitute ongi hartzen”, adierazi du. Algodoiz, lihoz, kalamuz, artilez edo zetaz egindako arropa eta osagarriak erabiltzen ditu tindaketak egiteko.
Eguberrietan Donostiako Frantzia Pasealekuko artisauen azokan parte hartzen du urtero Bastarrikak, eta egunero jartzen du postua bertan garai honetan. Eguberrietatik kanpo ere, Donostialdeko hainbat azokatan izaten da, baita Euskal Herriko nahiz kanpoko azoka ekologiko handiagoetan ere: Irungo Bioterra eta Bartzelonako eta Madrilgo Bioculturan, esaterako. “Duela 30 urte, honetan hasi nintzenean, inork ez zituen tindagai naturalak ezagutzen, oso arraroa zen, baina uste dut orain jende gehiago ari dela modu honetan tindatzen eta ezagunagoa dela”, gehitu du. Bere izena daraman webguneko dendaren bidez ere saltzen ditu arropak.
Tailerrak ere eman izan ditu Bastarrikak, baina nabarmentzen du ez duela horretarako leku aproposik, etxeko tailertxoan egiten baititu bere ekoizpenak. “Norbaitek herrian gune aproposik badu eta tailerren bat antolatu nahiko balu, egin genezake”, adierazi du.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
