Hastapenetik Bionekazaritza elkartearekin eta inguruko ekoizle agroekologikoekin harreman estua izan zuten Mendialdeko Ogia proiektuko kideek. “Guretzat oso garrantzitsua zen saretuta egotea, elkar laguntzea, txikien arteko sinergiak sortzea”, diote. Azazeta herrian jarri zuten lehen obratzailea martxan, eta agrodenda txiki bat ere ireki zuten, haien ogiaz gain inguruko beste ekoizleen produktuak saltzeko. Azazetako bost urteak ikasketa prozesua izan zirela diote, eta pixkanaka ogiaren munduan sakontzeko eta bezeroen sarea indartzeko balio izan zien. “2018an oinarri nahikoa bagenuela sumatzen genuen, inbertsio handixeagoa egitea erabaki eta Maeztun eraiki genuen obratzaile handiagoa”. Azpimarratu du pixkanaka, koskaz koska egindako bidea izan dela.

Gaur egun, zazpi langile dira proiektuan, eta ogi eta gozogintza ekologikoa egiten dute aste osoan. “Hainbat ogi mota egiten ditugu, betikoak bai, baina egunero saiatzen gara hemengo gari barietate zaharrekin egindako mota bereziagoren bat eskaintzen”. Zigilu ekologikoarekin ari dira, eta beraz, erabiltzen dituzten irin guztiak zertifikatuak dira, eta ahal den neurrian, ahalik eta hurbilenetik eskuratzen saiatzen dira. “Zazpi lagunek honetatik bizi ahal izateko, ogi bereziagoez gain, betiko bagettak ere egiten ditugu. Pentsatzen genuen ez genuela hori eginen, baina ohartu gara herriko jende askok hori eskatzen duela, eta ez dugu elite batentzat ekoitzi nahi, gure herriko okinak ere izan nahi dugu”. Ekoizpenaren zatirik handiena Maeztuko dendan bertan saltzen dute, baina inguruko kontsumo taldeetan eta Gasteizko Bionekazaritzan ere badituzte bezeroak.

Arabako gari barietate zaharrak berreskuratzeko lanean

Tokiko gari barietateak berreskuratzeko proiektu batean parte hartzen ari dira Mendialdeko Ogia proiektuko kideak. Hain zuzen, galduta zeuden Arabako hamar bat gari barietate Madrilgo germoplasma banku batetik atera eta Hazien Sarearekin, Bionekazaritzarekin eta Neikerrekin batera berreskuratzen ari dira. “Gariaraba izeneko proiektua izan da, eta pixkanaka ari gara barietate zahar horiek gure ogietan sartzen, Sabandoko gari Gorria, adibidez”. Ekoizpenaren %15 inguru Arabako barietateekin egiten dute, eta asmoa da pixkanaka kopurua handitzen joatea.