"Gastronomiaren resort" moduko bat da VISON, Japoniako Mie prefeturan dagoena. Donostiak "kale" bat du han, San Sebastian Street deiturikoa. Atrezzoko hainbat elementuk Gipuzkoako hiriburuaren tankera ematen diote, baina horrez gain, hiruki bat osatuz, hiru jatetxeren erreplikak daude, xehetasun handiko kopiak hirurak ere, bai izenean, bai kartan eta bai jarduteko eran: Ibaeta auzoko Aratz erretegia, Alde Zaharreko Casa Urola, eta Zuloaga Plazako Zazpi jatetxea. Euskal sukaldaritza tradizionalean egiten dute lan hiru jatetxeek, eta Jakitea Elkarteko kide dira, filosofia hori bultzatu eta tokiko produktuen alde egiteko.

Donostiara makina bat bidaia egindakoa da Tetsua Tachibana enpresari japoniarra, VISON gunearen jabea, eta bere ekinbidez eta adostasunez ireki ziren hiru jatetxeen "filial japoniarrak" 2022an. Izena hartu zieten, eta karta eta lan egiteko modua ere bai, hiru jatetxeetako buruek baieztatu dutenez. Dokumentalean ere hala ikusten da.

Javier Vicentek zuzendu du Little San Sebastian Street dokumentala. Bi aldeen topaketa erakusten du. Izan ere, Euskal Herritik Japoniarako bidaia abiatzen dute Iker eta Xabi Zabaleta anaiek (Aratz), Pablo Loureirok (Casa Urola) eta Paul Arrillagak (Zazpi), eta Tachibana enpresariarekin ez ezik, VISONeko bi sukaldarirekin ere elkartuko dira, lan egiteko moldea bertatik bertara ezagutzeko eta erabiltzen dituzten produktuen sorburua ezagutzeko, besteak beste, identitatean, filosofian eta errespetuan oinarrituta.

Japonian, Hokkaidon egiten den gastronomiaren zine jaialdi batean aurkeztu dute dokumentala, pasa den asteburuan, eta publikoaren saria jaso dute. Harrera beroa jaso dutela adierazi dutela adierazi dute.