Sutea gertatu den kalea.

Ostiral goizaldean sua piztu da Bilboko Uribarri auzoko eraikin batean. Sutea “ustekabean” sortu da eraikineko etxebizitza batean, Amaia Arregi Bilboko Udaleko Segurtasun zinegotziaren arabera. Suhiltzaileen bost kamioi bertaratu dira, eta hiru ordu eta erdiz aritu behar izan dute lanean sua itzaltzeko. Hamar anbulantziak ere jaso dute bertaratzeko deia, ezbeharrak 47 lagun utzi baititu arreta medikuaren premian, eta horietatik 24 ospitalera eraman behar izan dituzte, hiru adin txikikoak dira. Ospitaleratuetako bat “oso larri” dagoela jakinarazi dute, sua hasi den etxebizitzaren jabea hain zuzen lau; erredurak ditu, eta kea arnastu du.

Sua larri dagoen pertsona horren logelan hasi dela baieztatu dute Bilboko Suhiltzaileek, bera lotan ari zen lekuan. Arrazoiak, ordea, ez dira argitu oraindik. Azken horren etxea “guztiz erreta” geratu dela jakinarazi du udalak. Gainontzeko etxeetan ere kalteak nabarmenak izan dira, eta batzuek sua itzalitakoan etxera itzultzeko aukera izan badute ere, hainbatek beste etxebizitza batera joan behar izan dute. Bilboko Gizarte Larrialdietako Udal Zerbitzuak familia bati eskaini behar izan dio alternatiba.

Sua itzaltzeko lanetan aritu direnen artean ere izan da kalteturik. Suhiltzaile bat artatu behar izan dute eroriko batengatik, eta bi ertzain ere bai, kea arnasteagatik.