Bilboko portuan egin dute makroazpiegituraren aurkezpena.

Espainiako Estatuko Enagas gasoduktu sareak aurkeztu du proiektua Bilbon: Estatuan 2.600 kilometroko hidrogeno kanala eraikiko dute, horietatik 163 kilometro EAEn. Bi zati izango ditu eta nodo nagusia Arrigorriagan egongo da: Reocín-Arrigorriaga artean 38 kilometroko sarea eraikiko dute eta Arrigorriaga-Haro artean, beste 125 kilometrokoa. Europar Batasuna bultzatzen ari den ildoan doa azpiegitura, 400 milioi euro bideratuko ditu EAEk horretan, eta aurreikusi dute 2030erako prest egotea.

Sustatzaileen hitzetan, helburua da gas natural tradizionala ordezkatzea, energia berriztagarrien bidez ekoitzitako hidrogenoagatik, “berotegi efektua sortzen duten gasak murriztuta”.

Ordezkaritza instituzional oparoa egon da ekitaldian, tartean lehendakaria bera. Bere esanetan, “hidrogeno berdeak inpaktu ekonomiko eta sozial oso esanguratsua izango du Euskadin” eta “estrategikoa” da Lakuarentzat; sarean Euskal Energia Erakundearen bidez parte hartuko dutela ere baieztatu du. Kanalak hidrogenoa ekoizteko zentroak EAEko polo industrial nagusiekin lotuko dituela adierazi du Pradalesek, asmoa delako hidrogenoa industrian erabiltzea, baita garraioan eta energian ere.

Informazioa zabalduko dute 50 herritan

Makroazpiegitura honen bueltan, Parte-hartze Publikoko Plan Kontzeptuala abiatuko du Enagasek. Alegia, azaroaren 18tik abenduaren 19ra, Muskizen hasi eta beste 49 herritan, informazioa zabalduko du enpresak. 18 herritan jardunaldi parte-hartzaileak iragarri dituzte, “zalantzak argitzea, proiektuaren beharrak azaltzea, komunitateen parte-hartzea sustatzea eta ingurumenari eta gizarteari begira ekintza egokienak bermatzea xede”.

Gaiaz sakonago:

Irakurri ARGIAn Pello Zubiria Kaminoren erreportajea: Hidrogenoa: mirarizko energia garbia ala energiaren multinazionalen iruzurra?