Miguel Arribas "Kelo" Haziak liburua aurkezten, alberjiniei haziak erauzi bitartean.

Larunbatean, 9:30 aldera elkartu dira Zestoako Iraeta auzoan dagoen Amilibia baserriaren lurretan Amillubi proiektuko zenbait kide eta auzolanean parte hartu duten hainbat herritar. Bertan parte hartu duen kide batek kontatu duenez, "etxe inguruak garbitu ditugu. Alde batetik desbroze-lanak egin ditugu, bestetik etxe pareko aterpea garbitu eta txukundu, bertan hitzaldia egin ahal izateko".

Hazi ekologikoak lantzen hasi dira Amillubin

Ekologikoan ari den Aleka proiektuarekin elkarlana abiatua du Amillubi proiektuak: "Amillubiko lurretan Euskal Herriko hazi ekologikoak egiten dituen Aleka proiekturako alberjiniak eta brokoliak landatuta ditugu, horiek nola zeuden begiratu dugu eta egina zeuden alberjiniak bildu ditugu".

Hamaiketakoa egin ostean, alberjinia horiei haziak erauzten aritu dira, Alekako kide eta Haziak liburuaren egilea den Miguel Arribas Kelo-ren azalpenei jarraika, "borobilean, tertulian, patxadaz".

Haziak liburua aurkeztu du Miguel Arribas Kelok

Eguerdian egin dute liburu aurkezpena: "Dozena bat lagun elkartu gara lastozko fardotan jesarrita, alberjinien inguruan, eta Haziak liburua eskuartean. Amillubi eta Aleka proiektuak aurkeztu ditugu, gure arteko sinergiak azaldu, eta Kelo hasi da liburua egiteko prozesuaren inguruan eta edukiaren inguruan azalpenak ematen. Entzutearekin batera, alberjiniei haziak ateratzen jarraitu dugu. Beraz, konfiantzazko giro goxoan izan da liburuaren aurkezpena, eta haziak erauzi bitartean galderak egiteko eta solasaldi lasaia izateko parada izan dugu".

Haziak liburuaren hurrengo aurkezpen hitzaldiak beheko afixan ikus daitezke. Zure herrian hitzaldia antolatu nahi baduzu, idatzi solasaldiak@argia.eus helbidera.