Arrasateko ekotopaketetan parte hartu duten pertsonen argazkia.

 Jauzi Ekosozialak Euskal Herriko II. Ekotopaketak eraman ditu aurrera Arrasaten. Hiru egunetan zehar, 200 pertsona baino gehiago hurbildu direla azaldu dute eta horrek argi uzten duela Euskal Herrian "larrialdi ekosozial eta ekologistaren" gaineko ezinegonak garrantzia duela. Hainbat tokitatik ere topaketetara batu direla ezagutarazi dute, hala nola Mallorcatik, Kataluniatik, Andaluziatik eta Frantziako Estatutik. Ipar Euskal Herriko kideek ekologismoan duten ibilbidetik ikasteko aukera ere izan dela azpimarratu dute.

Ostiralean, hain zuzen, elikadura burujabetzaren gaiari heldu zitzaion ikuspegi ekofeminista batetik. Aldi berean, gazteek hizpide izan zuten pandemia aurretik mundu mailan hasiriko Fridays For Future mugimenduak Euskal Herrian izan zuen jarraipena. Eta testuinguru horretan, Arranek eta Jauzik zer proposamen ekosozialista eskaini zituzten.

"Egun handia" larunbatean izan zela adierazi dute, jende gehien bildu zena. Goizean, Euskal Herriko industriarekin zer egin eztabaidatu zen, "langile klaseak gidatua izan dadin aldaketa," eta hor energiaren gaiari ere heldu zitzaion. Paraleloki, beste mahai-inguru batean, garraio sektoreak planteatzen dituen problematikaz aritu ziren. Eguerdian, "turismoa herritarren lepora" bizi dela entzun ahal izan zen, "eta ez alderantziz", turistifikazioaren ondorio ekosozialetan zentratutako solasaldian. Horri guztiari heltzeko "estrategia bateratuaren inguruko hausnarketak" itxi zuen eguna.

Hausnarketaz haratago, aisialdirako ere espazioa izan zutela ezagutarazi dute: "Ostirala bertsoafari batekin bukatu zen eguna eta, larunbateko lehen orduan, Arrasaten eraikuntzari lotuta egon diren proiektu suntsitzaileak ezagutzeko txango bat egin zen". Gauean kontzertuak eskaini zituzten Arrasateko Gaztetxean, Mikosis eta Ezezez! taldeen eskutik. Bazkariak eta afariak Ereindajan Arrasate kontsumo elkarteak hornitu zituela adierazi dute. Topaketei amaiera emateko, Jauzi Ekosozialak batzar ireki bat egin zuen asteburua baloratzeko eta etorkizun hurbilerako ibilbide-orri bat irudikatzeko.

Azken balorazioa positiboa izan da: Garaiko erronkak behar duen mugimendu ekologista berria indartzen jarraitzeko eta eragile sortu berriaren hurrengo urratsak margozteko balio izan duela".