Erreniegako parke eolikoa. (Argazkia: Dani Blanco / CC BY-SA)

Biodibertsitateko Zerbitzuak hainbat argudio eman ditu proiektuari ateak ixteko: batetik, uste du inguruan babestu beharreko hegaztiak daudela eta haize-errotak mehatxua direla haien bizitzarako. Bestetik, eremuak dagoeneko gisa horretako egitura ugari duela. Horrez gain, inguruari paisaiaren eta balio ekologikoaren ikuspegitik parkeak eragingo liokeen kaltea ere aipatzen da. Eta, azkenik, azpimarratzen da azken boladan ureztatze eremuek, eta beraz nekazaritzak, inguruetan hartu duten garrantzia.

Ingurumen azterketa horrez gain, Industria saileko Energia Azpiegituren Atalak ere proiektuaren ebaluazio tekniko negatiboa egin du. Guztiaren ondorioz, Uxue Itoiz Industria, Energia eta Proiektu Estrategikoetako zuzendari nagusiak Inel-ek egindako eskaeraren aurkako ebazpena argitaratu berri du Nafarroako Aldizkari Ofizialak.

Sustrai-Erakuntza ingurumen elkartearen alegazioetakoak izan dira kontuan hartu direnetakoak. Elkartearen ustez, proiektu eoliko hau, azken finean, La Calera parke eolikoaren zabalkunde bat zen. Paisaiari eragindako kalteak ere aipatzen zituen eta, foru gobernuaren txostenak ebazten duenez, aerosorgailuak modu nabarmenean ikusi ahal izango dira Gares, Uterga, Legarda, Muruzabal, Artaxoa eta Mendigorriatik. Mendietan jarri nahi ziren sei haize-errota erraldoien altura 200 metrokoa zen.

Azken finean, lurralde hauetan garrantzi handia duen Donejakue Bideari eragingo lioke parkeak, baita beste tokiko turismo gune ugariri ere. Alegazioetan, halaber, aipatzen zen ez dela kalkulatu parkeak ikuspegi ekonomikotik eremuan izan zezakeen eragin ekonomikoa. Argudio horiek ere kontuan hartu ditu Industriaren ebazpenak.