Herriz herri ‘Nomadak gaitun!’ izenarekin antolatzen dituzten azokak dira Dinagu kolektiboaren ildo garrantzitsuenetako bat: “Sortzaile eta ekoizleontzat garrantzi handiko tokiak dira azokak, baina askotan bigarren mailako ekimen gisa hartzen dira”, nabarmendu du Aiartzaguenak. Izan ere, herriko festetan, edo urteko egun berezietan, gehigarri gisa antolatzen dira azoka asko, eta parte hartzen dutenekiko zaintza handiegirik gabe, zenbait kasutan. “Prekarietatetik ere asko izaten dute, batzuetan: eguraldi txarrarekin aurrera egiten da, karpa zure kontu doa, edo festa herriko erdigunean dago eta azoka bazter batean”.

Horren aurrean, sortzaileak eta ekoizleak protagonista eta erdigune izango diren azoka abiatu zuten Dinagu kolektibotik. Lehena 2021ean egin zuten Azpeitiko merkatu plazan, eta gerora etorri dira Egiako Teila Fabrikakoa, Gernikako Astrakoa, Hendaiako Borderline fabrikakoa, Sarako Usopopekoa… “Azpeitiko azokan hasi zen emakumezko sortzaileen eta nekazarien elkarlana, ohartu baikinen bion bidea oso antzekoa zela”, dio. Lazkaoko Biziolan eginen dute hurrengo azoka, abenduaren 13an eta 14an.

Azokaz azoka, postu anitzak

Azoka bakoitzean produktuen aniztasuna eskaintzen saiatzen dira kolektibotik. Ilustrazioa, bitxiak, osagarriak, kosmetika naturala, zeramika eta bestelako postuak izaten dira azoketan sortzaileen aldetik, eta elikagaietan, berriz, ogia, esnekiak, barazkiak, kontserbak, pasta, haragia eta beste zenbait produktu. “Ahal dugun neurrian, saiatzen gara asteko menu osoa osatzeko saskia eskaintzen azoketan”, dio. Eta, azoka berean produktuak asko ez errepikatzea ere bilatzen dute: “Azoka anitzak bultzatu nahi ditugu, alegia, produktu beraren lau postu ez izatea azoka bakarrean, ez errepikatzea”.

Aiartzaguenak nabarmendu du oso erantzun ona izan dutela orain arteko bidean, eta kontsumitzaileak, gainera, erostera hurbiltzen direla azoketara. “Azkeneko aldian laborari bat lehenengoz etorri zen Dinaguren azokara, eta harrituta zegoen, oso pozik, ia dena saldu eta postua hutsa zuelako”. Aurrera begira, kolektiboa formalizatu eta kideei tailerrak eta bestelako proposamenak eskaintzea nahi lukete, baina pixkanaka doaz. Momentuz, udalei eta bestelako entitateei azoka antolatzeko zerbitzua eskaintzen diete Dinagutik.