Haurdunaldian baja hartu zuenean otarren eskaintza bertan behera utzi zuen Gorosabelek. “Nire jardunaren zutabe nagusia izan dira otarreak urtetan, aukera ematen baitute ortuko plangintza egiteko eta hilero oinarrizko soldata bat izateko”. Baina eskaintza oso exijentea dela gaineratu du, izan ere, urte osoan, astero-astero produktu barietate anitza izateak lan handia eskatzen du ortuan. “Momentu horretan ez nengoen prest, eta otarren bidea gelditzea erabaki nuen”. Lanbide honetan ere, gogorarazi du ez dela gauza bera ama edo aita izatea.

Orain, barazki ekoizpenarekin segitzen du ekoizleak, baina Bergarako Elikaenean, Arrasateko Ereindajanen eta Gasteizko Urbide dendetan saltzen ditu produktuak batik bat. Aldi berean, bestelako bideak zabaltzen ari da, esaterako, baserri ondoko lursail batean kiwi landaketa koxkor bat eginen du udaberri honetan, eta lore ekoizpenean ere ari da murgiltzen. “Loreen ekoizpena barazkienarekin oso bateragarria da, hazkuntzan antzeko prozesua dutelako, eta ilusio berezia sortu didate berriz, zerbait berria delako, erronka moduko zerbait”. Dibertsifikatzeko eta ‘birziklatzeko’ beharra sentitu du azken urteetan, aurrera begira ere ekoizpenean segitzeko eta errentagarritasuna lortzeko.

Lore sorta freskoak eta lehortuak

Azken bizpahiru urteetan loreekin probak egiten aritu eta gero, lore hazkuntzaren inguruko formazioa egin du aurten Gorosabelek. “Orain arte gehiago izan da loreekin probatzea eta jolastea, teknikan aurten hasi naiz gehixeago sartzen”. Bi lore mota bereizten ditu ekoizleak: lehortzeko darabiltzanak eta lore freskoak. “Hazitik ekoizten ditut loreak, batzuk Euskal Herriko hazi ekologikoen Aleka proiektutik eskuratzen ditut, baina barietate gehiago edukitze aldera, gehienak Herbehereetatik ekarri ditut”.

Bere asmoa pixkanaka loreen hazi banku propioa osatzea da, baina pausoz pauso doa. “Asko ari naiz ikasten: badira mozketa bakar bateko loreak, moztu ahala ematen dutenak, aurten sartu eta datorren urte arte loratuko ez direnak…”. 15-20 lore barietate inguru ditu momentuz, eta azoketan saltzeaz gain, enkarguak ere hartzen ditu.  Interesa piztu duen arren, loreak hain galkorrak izanda jendeari balioa ematea kostatzen zaiola ere sumatu du. “Etxean lore sorta fresko batek sortzen duen dardara hori berreskuratu behar genuke”. Lore sorta ederrak ikusteko eta eskaerak egiteko  @elkoro.lorak Instagram kontua zabaldu du ekoizleak.