“Elikadura maiz ez da politika arlo zehatz gisa hartu izan, baizik eta hainbat arlotan agertu da zeharka, askotan arreta handiegirik jarri gabe”, adierazi du Marta Barba Gassó elkarteko elikadura dinamizatzaileak. Adibidetzat jarri ditu Gizarte Zerbitzuetatik elikadura eskubidea bermatzeko lanketak, edo zaintzen arloan elikaduraz arduratzea, ekitaldi kulturalen ondorengo mokaduak antolatzea… “Horietako bakoitzean landu genezake otorduetan bertako produktua eskaintzea eta bertako elikadura sistema bultzatzeko moduko hautuak egitea”, adierazi du.

Nekazaritzari lotutako politika publikoak estatu mailetan edo asko jota gobernu autonomikoetatik egin daitezkeenaren ustea orokortuta dagoela dio teknikariak, baina tokian tokiko administrazio eta eragileetatik ere asko egin daitekeela nabarmendu du. Horregatik, edozein alorretan diharduten udaletako ordezkari, kargu politiko nahiz langileei jardunaldirako gonbidapen berezia egin diete landa garapen elkartetik, baina orokorrean edozein herritarrentzat eta herriko eragilerentzat interesgarria izan daitekeela diote.

Euskal Herriko esperientzia eta proiektuak eredu

Bi mahai-inguru nagusi izanen dira jardunaldietan, lehenengoan tokiko elikadura sistema egituratzeari begira jarriko dira batik bat, eta bigarrenean, berriz, elikagaien ekoizpena bultzatzeko hainbat esperientzia ezagutzeko aukera izanen da. “Lehenengo blokean hondakinen gaiaz, zaintzaz, elikadura eskubideari lotutako zenbait proposamenez eta erosketa publikoetan txertatu litezkeen irizpideez ariko gara, besteak beste”, dio Barbak. Bizilurrek, Larrabetzuko Gurpide elkarteak, Mirua mikrokooperatibak eta Antsoaingo jangela komunitarioak hartuko dute parte bertan.

Bigarrenean, berriz, elikagaien ekoizpena bultzatzeko tokiko hainbat esperientzia ezagutaraziko dituzte: Andia Mankomunitateko Zunbeltz proiektua, eta Bergarako, Debagoienako eta Hernaniko Elikadura Mahaien esperientziak.

Informazio gehiago eta jardunaldian izena emateko bideak webgunean topatu daitezke.