Eredu agroekologikoan ari diren baserritarrek eratu dute sindikatua, beraien interesak defendatzeko "tresna eraginkor eta aktiboa" izan dadin. "Baserrietatik egiten den borroka agroekologikoaren erreferente sozial bihurtzeko anbizioz jaio da", kideek prentsa oharrean jakitera eman dutenez. Haien hitzetan, sindikatuaren helburu nagusiak dira "egun lehen sektoreak bizi dituen erasoen aurrean defentsarako tresna bihurtzea, eta bide horretan, elkarren babeserako tresna ere artikulatzea".  Ahots bateratua izango dela adierazi dute, "administrazioaren aurrean agroekologiaren eta baserri txikien garrantzia aldarrikatzeko".

"Sektorera irekita", erronkei aurre egiteko

Sektorera irekita dagoen sindikatua izan nahi du Baserritar Bilguneak: "Bereziki irekia euren lan egiteko eredua aldatu eta proposamen jasangarriagoetara gerturatzen ari diren edo gerturatu nahi duten baserritarrentzat, eredu industrialetik aldendu nahiko luketen nekazarientzat". Sektoreko gainontzekoekin topaguneak bilatu nahi dituzte, "arazo partekatuen aurrean borroka komuna sustatuta".

Sektoreak dituen erronken artean aipatu dituzte, batetik, ekoizpen-eredua lurraren defentsarekin uztartzea; eta bestetik, merkaturatze-sistema herritarren beharretara egokitzea, "ekoizle eta erosleen arteko zubi gertukoagoak eta sendoagoak eraikita". Horrez gain, lehen sektoreak bizi duen egoera prekarioari eta errelebo faltari aurre egitea ditu helburu nagusi sindikatuak.

Hurrengo urratsak

Aurrera begira zeregin hauek ditu esku artean Baserritar Bilguneak: sindikatua egituratzea, egungo egoeraren irakurketa partekatua egitea eta ekintzak zehaztea.   

Baserritar Bilguneak dei egin dio lehen sektoreari: “Lehen sektoreak bat egin beharko luke lurraldearen defentsan, ez bakarrik gure lanbidea eta bizimodua delako, baizik eta gure herrikideen elikadura osasuntsuaren eskubidearen alde egiten duelako”.